Արցախում բարձր են գնահատում ԵԿՄ մատուցած ծառայությունները. Բակո Սահակյան (լուսանկարներ)

Այսօր Արցախի նախագահականում՝ նախագահ Բակո Սահակյանը մայիսյան եռատոնի կապակցությամբ երկրապահ կամավորականների միության մի խումբ անդամների իրենց հայրենանվեր գործունեության համար պարգևատրեց Արիության և Մարտական խաչ շքանշաններով:

ԼՈՒՐԵՐ.com-ի թղթակցի փոխանցմամբ՝ Արցախի նախագահ Բակո Սահակյանն իր խոսքում բարձ գնահատեց երկրապահների գործունեությունը: Նա հատուկ անդրադարձավ ապրիլյան քառօրյա պատերազմում նրանց ներդրած ավանդին:

«Ես շատ առիթներ եմ ունենում գնահատելու երկրապահների գործունեությունը և որպես ապացույց օրինակ եմ բերում անցած տարվա ապրիլյան պատերազմի ժամանակ երկրապահների արձագանքը: Այդ ժամանակ երկրապահ կամավորականների միության նախագահ, Արցախի հերոս Մանվել Գրիգորյանն առաջիններից մեկն է կապ հաստատել մեզ հետ և 24 ժամ հետո 2500 կամավորականներ արդեն շարված էին կենտրոնական պաշտպանական շրջանում, որտեղից միանգամից մեկնել են ռազմաճակատ»,- ասաց Բակո Սահակյանը, որին հետևեց կամավորականների պարգևատրման պաշտոնական արարողությունը: Նախագահը անձամբ փակցրեց մեդալները երկրապաների կրծքին և լուսանկարվեց նրանց հետ:

Պաշտոնական միջոցառումն ավարտվեց նախագահական նստավայրի դիմաց արված միասնական լուսանկարով:

Լուսանկարները և տեսանյութը՝ ԼՈՒՐԵՐ.com-ի:
Քրիստինա Աղալարյան
Արցախ