Թամանյանի անվան ճարտարապետության թանգարանը ևս «Թանգարանային գիշերվա» ընթացքում բաց կլինի

Թանգարանների միջազգային օրվա' «Թանգարանային գիշեր» միջոցառումների շրջանակներում մայիսի 18-20-ը, Ալ. Թամանյանի անվան ճարտարապետության ազգային թանգարան-ինստիտուտում կազմակերպվելու են ցուցահանդեսներ և կոնֆերանսներ:

Ինչպես տեղեկացրին ՀՀ ԿԱ քաղաքաշինության պետական կոմիտեի մամուլի ծառայությունից, մայիսի 18-ին' ժամը 14։00-ին թանգարան-ինստիտուտի Թամանյան սրահում կբացվի «Ռուսաստանի հայկական եկեղեցիները»՝ Հայ առաքելական եկեղեցու Ռուսաստանի թեմի 300-ամյակին նվիրված ցուցահանդեսը: Ցուցահանդեսը այցելուներին հասանելի կլինի նաև մայիսի 20-ին ժամը 14 - 24.00-ը:

Մայիսի 18-ին ժամը 15։00-ին թանգարան-ինստիտուտի Տրդատ սրահում կկազմակերպվի կոնֆերանս' «Կորուսյալ հայրենիքի հուշարձանները» խորագրով (Արևմտյան Հայաստան այցելած ճարտարապետների մասնակցությամբ), իսկ մայիսի 20-ին, ժամը 14 - 24.00-ը' կցուցադրվի «Այդ հեռու, մոտիկ միջնադարը…» խորագիրը կրող ցուցահանդեսը:

Մայիսի 18-ին ժամը 16։00-ին նույն սրահում կցուցադրվի նաև Անիի' 1904-1917 թվականների ընթացքում պեղումների ընթացքում կատարված լուսանկարները (հեղինակ' Միքայել Մազմանյան):