Տուն է՝ թող լինի...

ՀՀ վարչապետ Կարեն Կարապետյանն այսօր կառավարության նիստի ժամանակ տեսչական ստուգումների կասեցումը երկարաձգելու վերաբերյալ հանձնարարական տվեց: Վարչապետը, հաշվի առնելով տեսչական բարեփոխումների այս փուլում իրականացվող օպտիմալացման աշխատանքները, ինչպես նաև տնտեսվարողներին որոշակի ժամանակահատվածով ստուգումների բեռից ազատման անհրաժեշտությունը, հանձնարարական ներկայացրեց ստուգումների կասեցումը մինչև տարեվերջ երկարաձգելու վերաբերյալ:

Վարչապետը նաև հայտնեց, որ ստուգումների ժամանակավոր կասեցումը նպատակ ունի բիզնեսը զերծ պահել անհարկի տեսչական միջամտություններից: Այս որոշումը թերևս որևէ մեկի մոտ զարմանք չառաջացրեց, նման մոտեցումը կառավարության կողմից կիրառվում է արդեն երկրորդ տարին: Եվ ամեն անգամ հավաստիացնում են, որ այդ որոշումը ժամանակավոր է և միտված է բիզնեսը խրախուսելուն: Այն, որ բիզնեսը դրանից առանձնապես չի խրախուսվել այս ողջ ընթացքում՝ պարզից էլ պարզ է: Հետևաբար, նույն հիմնավորումը երկրորդ տարին բերելով, կառավարությունը մատնում է իր ոչ կոմպետենտությունը և մատը մատին խփելու ցանկության իսպառ բացակայությունը: Եթե տվյալ տեսչական մարմինները այդքան խանգարում են բիզնեսի զարգացմանը, հարց է առաջանում՝ ինչո՞ւ են ստեղծել և ինչո՞ւ են պահում: Ստացվում է՝ երկու տարի շարունակ տասնյակ տեսչական մարմիններ պարապուրդի մեջ են գտնվում, որովհետև եթե տեսչության հիմնական գործառույթը ստուգումն է, իսկ նա դրանով զբաղվելու իրավունք չունի, ապա ի՞նչ պիտի անի ամիսներ ու տարիներ շարունակ: Այնուհետև, կառավարությանը օպտիմալացման պլան կմշակի և կհայտարարի, որ այս մարմինները արդյունավետ չեն աշխատել: Իսկ ինչպե՞ս պետք է արդյունավետ աշխատեին, եթե նրանց աշխատանքը կասեցվում է հենց կառավարության որոշումներով: Կառավարությունը կարծես հմտացել է աբսուրդային վիճակներ ստեղծելու, այնուհետև դրանք խիզախորեն հաղթահարելու գործում:

Ստելլա Խաչատրյան