Ծառահատումներ Երևանում. Սամվել Ալեքսանյանի քույրը գործի է անցել

«Առավոտ» թերթը այսօր գրել է, որ Մալաթիա-Սեբաստիա համայնքում, Անդրանիկի փողոցում՝ ակտիվ շինարարություն է ընթանում. կառուցապատողը Լիան Ալեքսանյանն է, որին պատկանող ընկերությանը՝ «Ա քույրեր» ՍՊԸ-ին, անցյալ տարի Երեւանի քաղաքապետարանը նույն համայնքի այլ փողոցում հողամաս է տրամադրել՝ աճուրդով: Այս ընկերության հիմնադիրներն են՝ Լիան Ալեքսանյան Լիմինդրի, Սվետիք Ալեքսանյան Լիմինդրի, Սոֆյա Ալեքսանյան Լիմինդրի, Արփենիկ Ալեքսանյան Լիմինդրի, Վարսենիկ Սիմոնյան Տելեմակի: Եվ իհարկե, շինարարությունը դժվար թե հարուցեր բնակիչների զայրույթն ու վրդովմունքը, եթե այն չիրականացվեր առանց այդ էլ նվազող կանաչ գոտու հաշվին: Բանն այն է, որ Սամվել Ալեքսանյանի քույրը, ըստ տեղի բնակիչների, շինարարության իրականացման ընթացքում նաև հաստաբուն ծառեր է կտրել տվել. «Ոնց կտրեցին էդ ծառերը՝ չտեսանք, առավոտ զարթնեցինք- տեսանք՝ արդեն շինարարություն են անում: Շատ խոշոր, հաստաբուն ծառեր չէին, բայց դրանք վաղուց էին տնկված, ու առանց այն էլ մեր տարածքում կանաչը քիչ է»,- լրագրողներին ասել են բնակիչները:

Այն որ կանաչ տարածքները Երևանին օդի ու ջրի պես են անհրաժեշտ, գիտեն բոլորը՝ Ալեքսանյանի ընտանիքից մինչև քաղաքապետարանի պատկան մարմիններ: Ծառահատումները, բնությանը տրված վնասը որևէ արդարացում ունենալ չի կարող, սակայն համաձայնեք` եթե այս ծառերը կտրեր մի խեղճուկրակ քաղաքացի, պատկան մարմիններն արդեն տաք հետքերով նրան գտել էին. գուցե նախագահի մակադակով մեկ անգամ ևս հայտարարության ականատես լինեինք: Բայց արի ու տես՝ երբ այդ նույն հանցանքը կատարվում է օրը ցերեկով, բոլորի աչքի առաջ, բայց օլիգարխի ընտանիքի անդամի կողմից՝ դա նորմալ է, դա թույլատրելի է: Մարդը իր սեփականությունը հանդիսացող տարածքում իր օբյեկտն է կառուցում: Եվ ոչինչ, որ Հռոմից էլ հին մեր մայրաքաղաքն արդեն իսկ անապատի է վերածվել, կարևորը՝ քրեաօլիգարխիկ իշխանության ֆինանսական հենարանը հանդիսացող գործարարները և նրանց ընտանիքի անդամների բիզնեսը չտուժեն: