Կառավարությունում ընթանում է Կարապետյան-Մեդվեդև առանձնազրույցը

ՀՀ կառավարությունում մեկնարկել են Հայաստանի և Ռուսաստանի կառավարությունների ղեկավարներ Կարեն Կարապետյանի ու Դմիտրի Մեդվեդևի բանակցությունները: Ընթանում է Կարապետյան-Մեդվեդև առանձնազրույցը, որի ավարտից հետո հանդիպումը կշարունակվի ընդլայնված կազմով՝ երկու երկրների կառավարությունների անդամների մասնակցությամբ:

Սպասվում է, որ բանակցություններից հետո կստորագրվեն միջկառավարական, միչգերատեսչական և միջտարածաշրջանային համագործակցությանն առնչվող փաստաթղթեր, որից հետո Կարեն Կարապետյանն ու Դմիտրի Մեդվեդևը ԶԼՄ ներկայացուցիչների համար հանդես կգան հայտարարություններով:  

ՌԴ վարչապետին «Զվարթնոց» օդանավակայանում դիմավորել է Կարեն Կարապետյանը: Դիմավորման պաշտոնական արարողությունից հետո Ռուսաստանի Դաշնության կառավարության ղեկավարն ուղևորվել է Ծիծեռնակաբերդի հուշահամալիր՝ հարգանքի տուրք մատուցել Հայոց ցեղասպանության զոհերի հիշատակին, որից հետո ժամանել ՀՀ կառավարություն:

Դմիտրի Մեդվեդևի գլխավորած պատվիրակության կազմում են ՌԴ կառավարության ղեկավարի առաջին տեղակալ Իգոր Շուվալովը, Ռուսաստանի կապի և զանգվածային հաղորդակցության նախարար Նիկոլայ Նիկոֆորովը, էներգետիկայի նախարար Ալեքսանդր Նովակը,  տրանսպորտի նախարար Մաքսիմ Սոկոլովը, գյուղատնտեսության նախարար Ալեքսանդր Տկաչովը, Սարատովի նահանգապետ Վալերի Ռադաևը, Էկոլոգիական,  տեխնոլոգիական և ատոմային վերահսկողության դաշնային ծառայության ղեկավար  Ալեքսեյ Ալյոշինը, «Գազպրոմ» ՀԲԸ վարչության նախագահ Ալեքսեյ Միլլերը,  պաշտոնատար այլ անձինք:

Հայաստանի պաշտոնական այցի ընթացքում նախատեսվում է նաև ՌԴ վարչապետի հանդիպումը ՀՀ Նախագահ Սերժ Սարգսյանի հետ:

Հայտնի է, որ հոկտեմբերի 25-ին Երևանում կայանալու է Եվրասիական միջակառավարական խորհրդի նիստը: