Կատարվեց նկարչուհի Էմմա Թումանյանի մեծ երազանքը

Հոկտեմբերի 25-ին, Հայաստանի նկարիչների միության տանը տեղի ունեցավ երիտասարդ նկարչուհի Էմմա Թումանյանի նկարների 2-րդ ցուցահանդեսը:

Արվեստասերների դատին հանձնվեց 40 կտավ-յուղաներկ:

Երիտասարդ նկարչուհին իր մտածելակերպով, գույների ու կերպարների համադրությամբ տարբերվում է շատ-շատերից: Ինչպես նշեց ցուցահանդեսի մասնակից՝ պրոդյուսեր ու սցենարիստ Արփի Վանյանը, Էմմայի նկարները պատմում են այն ամենը, ինչի մասին բոլորս գիտենք, բայց լռում ենք:

Այո՛, նկարչուհու ընտրած թեմաները սոցիալական են, մեզ հուզող առօրյա կյանքն է պատկերված նրա կտավներում:

ՀՀ Վաստակավոր արտիստուհի Գայանե Մկրտչյանը նկատեց, որ Էմմայի նկարներում ցավ ու կսկիծ կա, տառապանք, ու գեղեցիկի մասին երազանք: Երիտասարդ նկարչուհու կտավները անտարբեր չթողեցին ոչ ոքի, ուրախալի է, որ նրա գործերը նայելու էին եկել նաև երիտասարդ սերնդի շատ ներկայացուցիչներ, դերասաններ, ապագա նկարիչներ, ստեղծագործող մարդիկ, և նրանք բոլորն էլ միաբերան նշում էին, որ Էմմա Թումանյանը ինքնատիպ մտածելակերպով և ուրույն վրձին ունեցող նկարչուհի է:

Կա մի հանգամանք ևս, որը հպարտանալու և ուրախանալու տեղիք է տալիս: Արտասահմանյան տարբեր կազմակերպություններից ցանկություն են հայտնել նրա նկարների ցուցահանդես-վաճառք կազմակերպել իրենց մոտ, սակայն Էմման նախընտրել է ցուցահանդես կազմակերպել իր երկրում, իր սիրելի քաղաքում:

«Էմման մեր երկրի սիրահարն է: Նա մի մեծ երազանք ունի. տեսնել մեր երկիրը ծաղկուն, իսկ մարդկանց՝ ձերբազատված ցավից ու տառապանքից»,-ասում է նրա հայրը՝ Կարեն Թումանյանը: 

Շնորհավորելով երիտասարդ նկարչուհուն՝ ցանկանում ենք, որ նրա այս և ապագա այլ աշխատանքները սիրված ու ճանաչված դառնան ամբողջ աշխարհում: