Ողբերգությունից 18 տարի անց. Հոկտեմբերի 27

Հայաստան 27 Հոկտեմբեր, 2017 0:14

18 տարի առաջ այս օրը՝ հոկտեմբերի 27-ին, տեղի ունեցավ Հայաստանի 3-րդ հանրապետության պատմության ամենաողբերգական ահաբեկչությունը:

ՀՀ ԱԺ-կառավարություն հարցուպատասխանի ժամանակ, մինչև ատամները զինված ահաբեկիչները Նաիրի և Կարեն Հունանյանների գլխավորությամբ ներխուժեցին ԱԺ և գնդահակարեցին ՀՀ օրենսդիր և գործադիր իշխանության ներկայացուցիչներին:

Սպանվեցին ՀՀ ԱԺ նախագահ Կարեն Դեմիրճյանը, վարչապետ Վազգեն Սարգսյանը, Աժ փոխնախագահներ Յուրի Բախշյան ու Ռուբեն Միրոյանը, պետնախարարն ու պատգամավորներ Միքայել Քոթանյանը, Հենրիկ Աբրահամյանը, Արմենակ Արմենակյանը, պետնախարար Լեոնարդ Պետրոսյանը։

Սպանվածների դիակները խորհրդարանի շենքից դուրս բերվեցին միայն ուշ երեկոյան: Մինչ այդ, ահաբեկիչները որոշակի պահանջներ էին ներկայացնում ու անընդհատ կանչում այդ ժամանակ ՀՀ նախագահ Ռոբերտ Քոչարյանին: Նաիրի Հունանյանի հետ միայնակ, դեմառդեմ հանդիպեց այն ժամանակվա գործող նախագահ Ռոբերտ Քոչարյանը, և մինչ օրս հայտնի չէ, թե ի՞նչ են խոսել։ Մինչ օրս հասարակական – քաղաքական շրջանակներում այդ հանդիպումը բազում հարցականների և կասկածների տեղիք է տալիս:

91 մարդ, այդ թվում պատգամավորներ և լրագրողներ պատանդ էին պահվում խորհրդարանի նիստերի դահլիճում: Պատանդներն ազատ արձակվեցին հոկտեմբերի 28-ի առավոտյան:

ՆաիրիՀունանյանը, ԿարենՀունանյանը, Վռամ Գալստյանը, Դերենիկ Բեջանյանը Էդիկ Գրիգորյանն ու Աշոտ Կնյազյանը դատապարտվեցին ցմահ ազատազրկման:2004 թվականի ապրիլի 27-ին մենախցում՝ հոսանքահարվելու հետևանքով մահացավ Վռամ Գալստյանը:

Ողբերգությունից անցել է 18 տարի, բայց հասարակության զգալի մասը չի հավատում որ գործը բացահայտվել է: Տարբեր գործիչներ ունեն տարբեր կարծիքներ՝ այդ թվում դրսի ուժերի մասնակցություն:

Ստորև ներկայացնում ենք կադրեր, որոնք արվել են դեպքի օրը: