Superjet-ի օգտագործված ինքնաթիռները՝ աղքատ Հայաստանին

Հայաստանում ազգային ավիափոխադրող ստեղծելու հարցը տարատեսակ քննարկումների առիթ է տվել՝ հատկապես այն պատճառով, որ ստեղծվելու է Sukhoi Superjet 100 ռուսական ինքնաթիռների բազայի հիման վրա։ Նշենք, որ դեռևս հոկտեմբեր ամսվա սկզբին՝ ՌԴ արդյունաբերության և առևտրի նախարար Դենիս Մանտուրովը` Երևան կատարած այցի ժամանակ հայտարարել էր, որ Հայաստանում նոր ազգային ավիաընկերությունը կգործի, երբ հիմնավորվի դրա՝ տնտեսապես շահավետ լինելը։ 

ԼՈւՐԵՐ․com-ի թղթակցի հետ զրույցում «Ազգային ավիացիոն ասոցիացիա» կազմակերպության նախագահ Դմիտրի Ադբաշյանը ընդգծեց՝ ազգային ավիաընկերություն ունենալու նախաձեռնությունը ողջունելի է, եթե այն համապատասխանի ասվածին․ «Ազգային փոխադրող հասկացությունը բավականին բարդ խոսակցություն է։ Այն պետք է կառավարության հետ պայմանագիր ունենա։ Շատ կարևոր են ֆինանսական հարցերը, թե ի՞նչ պայմաններ կլինեն, ի՞նչ հաճախականությամբ կիրականացվեն թռիչքները, ուղևորներ կլինե՞ն, արտոնություններ կլինե՞ն ուղևորների համար։ Sukhoi Superjet 100-ը հայկական շուկայում կիրառելու նպատակահարմարությունը կախված է «Զվարթնոց» օդանավակայանի ծառայությունների պայմաններից:

«Արմավիա»-ի մասին էլ էին ասում՝ ազգային փախադրող է, բայց այն ազգային փոխադրող չէր․ օգտվում էր իրավունքներից, բայց ոչ մի պարտականություն չուներ։ Ամեն բան լավ կլինի, եթե ազգային փոխադրող ասվածն աշխատի»,- ասաց նա։ 

Նրա խոսքով՝ Superjet–ը ժամանակակից ինքնաթիռ է, որը ստեղծվել է կարճ թռիչքների համար, արևմտյան արտադրանք է և արդեն գրեթե չի զիջում Airbus-ին ու Boeing-ին։ 

«Համոզված եմ, որ  աերոֆլոտը մեզ ոչ թե նոր ինքնաթիռներ կտրամադրի, այլ օգտագործածները, որոնք իրենց ռեսուրսի մի մասը ծախսել են, սակայն դրանք մեզ կհանձնեն ավելի էժան գներով, քան արտասահմանյան մոդելները»,- ասաց նա: 

Որոշ փորձագետների կարծիքով՝ Ռուսաստանն իր անսարք ինքնաթիռները մեզ վրա է վաճառում, քանի որ այլ գնորդներ չկան, այս տեսակետի հետ, սակայն, Ադբաշյանն այնքան էլ համամիտ չէ․ «ՌԴ-ն ուզում է, որ իր ինքնաթիռները նոր լինեն։ Եթե որևէ ընկերության մասին խոսք է գնում, առաջինը հարցնում են՝ ինչքան է ինքնաթիռների միջին տարիքը, և որքան քիչ է տարիքը, այնքան ավելի բարձրանում է տվյալ ընկերության հեղինակությունը: Superjet ինքնաթիռները հիմա արդեն վաճառվում են Մեքսիկային և մի քանի աղքատ երկրների»,- նկատեց փորձագետը։

Նշենք, որ դեռևս տարիներ առաջ Հայաստանը հրաժարվել էր Superjet ինքնաթիռներից տեխնիկական որոշակի խնդիրների պատճառով։ Սակայն, ըստ մեր զրուցակցի՝ այդ խնդիրներն արդեն վերացվել են, և ինքնաթիռների վերջին մոդելներն արդեն ավելի լավ վիճակում են գտնվում։

Սոնա Հարությունյան