Ձեռքի հետ լրագրո՞ղ, թե՞ նախարար. լեզվակռիվ Եռաբլուրում

Օրեր առաջ, երբ ԱԺ հերթական նիստի ժամանակ քննարկվում էր «Զինվորական ծառայության և զինծառայողի կարգավիճակի մասին» օրենքի նախագիծը, Պաշտպանության նախարար Վիգեն Սարգսյանը ԱԺ միջանցքում «անտակտ» էր անվանել լրագրողներին:

Լրագրողի դիտարկմանը` նախարարն ընդամենը մեկ նախադասություն պետք է ասեր և իրենց հարցի պատասխանը ստանալով` ստիպված չէին լինի արժանանալ նման վերաբերմունքի, նախարարը նկատեց. «Դուք նորից գնահատական եք տալիս և ակնկալում եք պատասխան: Դա մասնագիտական նախընտրությունների հարց է. ես սիրում եմ մտածված, խորքային լրագրություն: Ես համարում եմ, որ լրագրությունը հսկայական դեր ունի խաղալու մեր երկրի կայացման հարցում, քաղաքացիական հասարակության կայացման հարցում, և կարծում եմ, որ միջանցքներում մուրացած կամ կորզած արտահայտություններից կիսատ եզրակացություն անող լրագրությունը ֆաստ-ֆուդի նման մի բան է: Դրա համար ունեմ մամուլի ասուլիսների ձևաչափ: Իհարկե, հասկանում եմ՝ ձեզ համար հարմար է աշխատել այդպես ոտքի վրա»,- ասաց նախարարը: Դիտարկմանը` այդ օրը ՊՆ -ը հայտարարել էր, որ լարվածության աճ է լինելու և նախարարը կարող էր շատ կարճ պատասխանել սահմանին տիրող իրավիճակի մասին հարցին, Սարգսյանը նկատեց. «Անտակտը վիրավորական խոսք չէ, այլ` գնահատական»:

Թեև նախարարը շարունակեց պատասխանել լրագրողների հարցերին, սակայն զրույցի վերջում առիթը բաց չթողեց ևս մեկ անգամ լրագրողին վիրավորելու. «Դուք մասնագիտությամբ լրագրո՞ղ եք, թե՞ ձեռքի հետ եք զբաղվում լրագրությամբ»,- հարցրեց նախարարը: Հարցին լրագրողը հարցով պատասխանեց. «Դուք նախարա՞ր եք, թե՞ ձեռքի հետ եք հանդես գալիս որպես նախարար»:

Սոնա Հարությունյան