Տեսանյութ. Էտ, թե՞ ծառահատում
ՀասարակությունԵրեւանի Պարույր Սեւակ փողոցի բնակչից ահազանգ է ստացվել հոկտեմբերի 25-ին Երեւանի քննչական վարչության բակում ծառահատում իրականացնելու վերաբերյալ, հաղորդում է «ԷկոԼուրը»:
«Պատշգամբից տեսա, թե ինչպես են կտրում կանաչ ծառը: Հողին հավասարեցրին նաեւ նախկինում կտրած ծառերի կոճղերը եւ բոլորը ծածկեցին հողով: Երեւանի քաղաքապետարանի թեժ գծից ինձ հայտնեցին, որ հատված ծառը փտած է եղել եւ վտանգ է ներկայացրել, դրա համար էլ իրականացվել է ծառահատում: Չեմ կարծում, որ կանաչ եւ երիտասարդ ծառը փտած լիներ: Առանց այն էլ մեզ մոտ ծառերը քիչ են, շատ եմ ափսոսում յուրաքանչյուր ծառի կորստի համար»,-ասաց Երեւանի բնակչուհին` «էկոԼուրին» տրամադրելով լուսանկարներ եւ տեսանյութեր:
Այս առնչությամբ, ՀՀ քննչական կոմիտեի նախագահի խորհրդական Սոնա Տռուզյանը հայտնեց. «Երեւանի քննչական վարչությունը հետեւողական է իր տարածքի բարեկարգման եւ կանաչապատման աշխատանքների նկատմամբ: Անցած մեկ ու կես տարվա ընթացքում, ինչ շենքը հատկացվել է վարչությանը, շուրջ 400 ծառ եւ թուփ է տնկվել` ապահովելով նրանց պատշաճ մշակումը: Զուգահեռ խնամվում են ավելի մեծ տարիք ունեցող ծառերը: Համապատասխան մասնագետների կողմից կատարվել են էտման աշխատանքներ` ծառերի հետագա նորմալ աճը ապահովելու համար: Որեւէ հատում չի իրականացվել: Ահազանգողին հրավիրում ենք նշված տարածք` տեղում ծանոթանալու իրականացված կանաչապատման աշխատանքներին»:
ՈՒՂԻՂ ԵԹԵՐ
Ամենադիտված 
Մահացել է բժիշկ Տիգրան Վարդանյանը
