Իմ տղաները ներդրում են անում, չանե՞ն էս երկրում ներդրում. Վարդան Հարությունյան

Կառավարության նիստերից մեկի ժամանակ գործադիրը հավանություն տվեց «Գրին ֆարմեր» ընկերությանը, որի սեփականատերերից են  ՀՀ պետեկամուտների կոմիտեի նախագահ Վարդան Հարությունյանի երկու որդիները՝ Հենրիկ եւ Ռուբեն Հարությունյանները, հարկային արտոնություններ տալուն: 

Կառավարության որոշման մեջ նշված է՝ «Գրին Ֆարմեր» ընկերությունը, որը Երասխում հիմնում է ինտենսիվ այգիներ եւ պատրաստվում է ավելի քան 2 միլիոն դոլարի ներդրում իրականացնել, ազատվելու է ներկրող ապրանքների մաքսատուրքից, ինչպես նաեւ երեք տարով հետաձգվելու է սահմանի վրա գանձվելիք ավելացված արժեքի հարկի վճարումը:

Այսօր Ազգային ժողովում ՊԵԿ նախագահ Վարդան Հարությունյանից լրագրողները հետաքրքրվեցին՝ ինչո՞ւ են մեր երկրում սովորաբար արտոնություններ ստանում պաշտոնյաներն ու նրանց փոխկապակցված անձինք; Հարցին ի պատասխան՝ Հարությունյանը վստահեցրեց, որ հարկային արտոնություններ ստանում են բոլոր նրանք, ովքեր դիմում են՝ խորհուրդ տալով ՀՀ ֆինանսների նախարարությունից՝ ճշտել այդ ցանկը: 

«Իմ տղաները ներդում են անում, չանե՞ն էս երկրում ներդում: Նրանք ջերմոցներ են դնում, իսկ հարկային արտոնություն ստանում են բոլոր նրանք, ովքեր դիմում են»: 

Նշենք, որ այս ընկերությունը Կոտայքի մարզում կառուցում է ջերմոց, որտեղ ներդրումների ծավալը կազմում է շուրջ 12 միլիոն դոլար: