Խաչիկյանները՝ Թամազյանի դեմ. Ախթալայում լարվածությունը պահպանվում է

Վերլուծական 31 Հոկտեմբեր, 2017 18:00

Ակնհայտ է, որ ՀՀ կառավարությունը շարունակում է չկարեւորել համայնքների գրագետ կառավարումը: Առանձին համայնքներում, օրինակ` Ախթալա քաղաքում, թշնամական մթնոլորտում համայնքապետի պաշտոնի համար միմյանց դեմ պայքարում են հանրապետականները: Նոյեմբերի 5-ին Ախթալայի քաղաքապետի ընտրություններում առաջադրված են հանրապետականներ Հայկազ Խաչիկյանը և Սուրեն Թամազյանը, իսկ երրորդ թեկնածուն Արկադի Թամազյանն է: Այն, ինչ կատարվում է Ախթալայում, հիշեցնում է ոչ միայն պարզապես իշխանության համար պայքար, այլեւ սեփականության բաժանում: Ակտիվներում է Ախթալայի լեռնահարստացուցիչ կոմբինատը, Շամլուղի պղնձի հանքավայրը: Խաչիկյանի թեկնածությանը դեմ են Ախթալայի այն բնակիչները, ովքեր կապ են ունեցել Ախթալայի լեռնահարստացման կոմբինատի նախկին սեփականատեր Սերոբ Տեր-Պողոսյանի հետ: Լեռնահարստացման կոմբինատի (ԼՀԿ) անվտանգության ծառության պետ Արսեն Չիթչյանի (մականունը` Բոդոլ) ղեկավարությամբ՝ Սերոբ Տեր-Պողոսյանի համախոհները հիմա աշխատում են Ս. Թամազյանի օգտին:

Ախթալայում ՀՀ սոցիալական ապահովության պետական ծառայության նախկին պետ Վազգեն Խաչիկյանի եղբայր Հայկազ Խաչիկյանի և Ախթալայի նախկին քաղաքապետ, ՀՀԿ-ական Սուրեն Թամազյանի մրցակցությունը, իսկ տեղաբնակների գնահատմամբ՝ հակամարտությունը, մեկ տասնամյակից ավելի պատմություն ունի. բոլոր ՏԻՄ ընտրություններում Թամազյանները միավորվում են ընդդեմ Ախթալայի գործող քաղաքապետի (2012-ի ՏԻՄ ընտրություններում նրանց միջև բախում էր եղել, հնչել էին կրակոցներ, սկզբում Սուրեն Թամազյանի կողմնակիցները հարձակում էին գործել Հայկազ Խաչիկյանի տան վրա՝ ջարդուփշուր անելով ամեն ինչ, ապա Խաչիկյանի մերձավորներն էին ներխուժել Թամազյանի մտերիմների բնակարան, որից հետո քրգործ էր հարուցվել)։ Առաջին նախադեպը 2008-ի ՏԻՄ ընտրություններին էր, երբ, ինչպեսև 2012-ի ընտրությունների ժամանակ, հաղթեց Խաչիկյանը: Վերջինս ու Թամազյանը միմյանց դեմ պայքարում էին նաև նախորդ տարվա՝ 2016-ի հոկտեմբերի 2-ի ՏԻՄ ընտրություններում. երրորդ թեկնածուն ՀԱԿ անդամ Սասուն Վարդումյանն էր: Նախորդ տարվա հոկտեմբերի 2-ի ՏԻՄ ընտրություններին ևս հաղթեց Խաչիկյանը: Խաչիկյան եղբայրների գործոնով պայմանավորված` Ախթալայում լարված ընտրություններ են սպասվում։

Ստելլա Խաչատրյան