Հանդիպում Հրանտ Թոխատյանի, Արմինե Հովհաննիսյանի և Նարեկ Հարությունյանի հետ

Վերսկսելով «Արվեստանոց» ուսուցողական ծրագիրը, «Նարեկացի» արվեստի միությունը տեղեկացնում է, որ նոյեմբերի 2-ին՝ ժամը 14:00-ին, 9-ից 14 տարեկան երեխաները և պատանիները կարող են ներկա գտնվել «Մանկություն» խորագիրը կրող հանդիպմանը, որի ընթացքում նրանք կփորձեն գտնել մանկության երազների իրականացման բանալիներն ու բացահայտել այն հեքիաթային ճանապարհը, որը տանում է բարու և մաքրության աշխարհ:

Այս հանդիպման հյուրերը կլինեն «Նարեկացի» արվեստի միության հիմնադիր Նարեկ Հարությունյանը, «Օրրան» բարեգործական հասարակական կազմակերպության հիմնադիր Արմինե Հովհաննիսյանը և ՀՀ ժողովրդական արտիստ, դերասան Հրանտ Թոխատյանը. մարդիկ, ովքեր իրենց ուսերին են կրում լավատեսության և նվիրման դժվարին, բայց առաքինի բեռը, մարդիկ, ովքեր գիտեն երազներ բաժանել և դրանք իրականություն դարձնել: