Հայաստանում պրոբացիոն ծառայության աշխատակիցների թիվը 35-ով կավելանա

Հայաստանում պրոբացիոն ծառայության աշխատակիցների թիվը 2018թ. կավելանա ևս 35-ով: Ազգային ժողովում ՀՀ 2018թ. պետական բյուջեի նախագծի քննարկմանն այս մասին հայտնեց ՀՀ արդարադատության նախարար Դավիթ Հարությունյանը: «Այս պահին մենք ունենք պրոբացիոն ծառայության 77 աշխատակից, 2018թ. պլանավորում ենք նրանց թիվն ավելացնել 35-ով և պետական բյուջեի նախագծում նախատեսել ենք 35 հաստիքների ավելացում: Դուք հիշում եք, որ պրոբացիոն ծառայության ներդրման քննարկման ժամանակ մենք ներկայացնում էինք երկարաժամկետ ծրագիր, որի համաձայն՝ պրոբացիոն ծառայության աշխատակիցների թիվը քայլ առ քայլ պետք է հասցնենք 210-220-ի: Մենք այդ ուղղությամբ հերթական քայլն ենք անում»,- ընդգծեց Հարությունյանը:

Նախարարը հավելեց, որ ՀՀ-ում պրոբացիոն ծառայության աշխատանքի էական արդյունքները կզգացվեն առաջիկա 5-7 տարիների ընթացքում: «Դա պայմանավորված է և աշխատանքի արդյունավետության բարձրացմամբ և, միգուցե, որոշակի մեխանիզմների վերանայմամբ: Ես ցանկանում եմ մի օրինակ բերել: Եթե ծառայությունն աշխատում է պայմանական վաղաժամկետ ազատվածների հետ, ապա ճիշտ կլինի, որ ծառայության աշխատակիցները մասնակցեն դատապարտյալին պայմանական վաղաժամկետ ազատելու որոշման քննարկմանը: Կարծում եմ, որ պրոբացիոն ծառայության աշխատակիցը դատապարտյալին ազատ արձակելուց 6 ամիս շուտ պետք է սկսի իր աշխատանքը քրեակատարողական հիմնարկում, որպեսզի այդ ամիսների կազմի իր եզրակացությունը, հասկանա որքանով է պատրաստ իր վրա վերցնել պատասխանատվությունը: Սա երկարատև գործընթաց է, ուստի կարծում եմ, որ առաջիկա 5-7 տարիների ընթացքում մենք կզգանք էական փոփոխություններ»,- եզրափակեց Հարությունյանը: