Երևանի թիվ 26 մանկապարտեզը հիմնանորոգումից հետո իր դռներն է բացել ավելի քան 110 սաների առջև

 Երևանի քաղաքապետ Տարոն Մարգարյանը ներկա է գտնվել Երևանի թիվ 26 մանկապարտեզի վերաբացման հանդիսավոր արարողությանը: Երևանի քաղաքապետարանի տարեկան ծրագրով հիմնանորոգված նախակրթարանն իր դռներն է բացել ավելի քան 110 փոքրիկների առջև: Մանկապարտեզի բացման պատիվը վերապահվել է քաղաքապետ Տարոն Մարգարյանին և տնօրեն Նադեժդա Բաղրամյանին:

Ինչպես ԼՈՒՐԵՐ.com-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից, Արաբկիր վարչական շրջանի ղեկավարի ուղեկցությամբ քաղաքապետ Տարոն Մարգարյանը շրջել է խմբասենյակներում, ծանոթացել կատարված աշխատանքներին ու փոքրիկների կրթության և դաստիարակության համար ստեղծված պայմաններին: Օգտվելով առիթից՝ մանկապարտեզի տնօրենը շնորհակալություն է հայտնել Երևանի քաղաքապետին ցուցաբերվող մշտական ուշադրության ու հոգածության  համար, ընդգծելով, որ վերջին տարիներին նախակրթարանների պայմանների բարելավմանն ուղղված  ծրագրերն իսկապես բազմաբնույթ են ու ծավալուն: Քաղաքապետ Տարոն Մարգարյանն էլ իր հերթին  վստահեցրել է, որ մանկապարտեզներում իրականացվող հիմնանորոգման ու անհրաժեշտ գույքով ապահովման ծրագրերը լինելու են շարունակական:

Ավելի քան 50 տարվա պատմություն ունեցող այս կրթօջախն ստեղծման օրից ի վեր երբևէ հիմնանորոգման չէր ենթարկվել: