Բանկերը գրավադրվող գույքը արհեստականորեն շուկայականից ցածր են գնահատում

Գրավի առարկա հանդիսացող անշարժ կամ շարժական գույքից է կախված տրամադրվող վարկի չափը, անշարժ գույքի գնահատումը գրավադրման նպատակով հանդիսանում է այդ վարկային գործընթացի կարևորագույն ցուցիչներից և գործոններից մեկը: Այս մասին այսօր լրագրողների հետ հանդիպման ժամանակ ասաց անշարժ գույքի գնահատման ընկերության տնօրեն Արա Ադուրյանը՝ խոսելով ՀՀ-ում բանկային համակարգում գրավադրվող գույքի գնահատման բացթողումների և անշարժ գույքի շուկայում տիրող վիճակի մասին:

Հարցին՝ անշարժ գույքի գործակալները խնդիր են տեսնում գնահատման ինստիտուտի մեջ, ի՞նչն է պատճառը, որ գնահատող ընկերությունը գրավադրվող գույքը ցածր է գնահատում շուկայական գնից, Ադուրյանը նշեց․

«Վարկառուների կողմից ձևավորված կարծիք կա, որ գնահատող ընկերությունները արհեստականորեն ցածր են գնահատում կամ ավելորդ պահպանողականություն  են դրսևորում գնահատման ժամանակ։ Կա նման բան, ես իհարկե չգիտեմ՝ որ ընկերություններն են անում, սակայն չեմ կարող ասել որ չկա նման բան։ Սակայն կոնկրետ մեզ համար՝ կապ չունի, թե ինչի համար է գրավադրվում գույքը։

Բացի շուկայական արժեքից, գնահատողները գնահատում են նրա լիկվիդային արժեքը։ Դա իրենից ներկայացնում է գույքի ավելի արագ, նախատեսվող ժամանակից ավելի շուտ իրացվելիք արժեք։ Հիմնականում վարկավորումը որպես ելակետային տվյալ ընդունում է հենց այդ արժեքը»,- նշեց Ադուրյանը։

«Բանկերը համագործակցում են գնահատող ընկերությունների հետ։ Ընտրությունն իրականացվում է  մրցութային կարգով: Մրցույթներն անցնում են շատ խիստ պայքարում, թափանցիկ, և դա բխում է հենց մրցույթը անցկացնողի՝ բանկի կամ վարկային կազմակերպությունների շահերից, որպեսզի ընտրվեն իրենց  պահանջներին համապատասխանող գնահատող ընկերություններ, որոնք պետք է տարիների փորձ ունենան: Հաշվի է առնվում տարիների դրական վարկային պատմությունը, պարտաճանաչությունը և այլն»,- ասաց նա։

Նա նշեց՝ ոլորտում կան խնդիրներ, և կադաստրի պետական կոմիտեի համապատասխան հանձնաժողովի մասնագետների կողմից պարբերաբար քննարկումներ են իրականացվում խնդիրները լուծելի դարձնելու համար։

Այլ երկրներում հիմնականում վարկը տրամադրվում է  անձնական ցուցանիշների հիման վրա, իսկ մեզ մոտ կարևորը գրավն է, քանի որ այլընտրանք չկա։