Գիտությունը կվերանա. տարկետման իրավունքը վերացնելու օրինագծին դեմ են նաև դասախոսները

Պաշտպանության նախարարությունը ընդունել է «Զինվորական ծառայության և զինծառայողի կարգավիճակի մասին» օրենքի նախագիծը, որով Հայաստանի բուհերում տղա ուսանողներին տրվող տարկետման ձևը փոխվում է։ Ակադեմիական տարկետման իրավունքն, ըստ էության, վերացնելը դժգոհություններ է առաջացրել շատ ուսանողների մոտ։ Օրինագիծը վիճահարույց են համարում նաև դասախոսական անձնակազմի որոշ ներկայացուցիչներ: 

ԼՈՒՐԵՐ․com-ի թղթակցի հետ զրույցում օրինագծի վերաբերյալ իր մտահոգությունը և բացասական վերաբերմունքը հայտնեց ԵՊՀ քիմիայի ֆակուլտետի օրգանական քիմիայի ամբիոնի վարիչ Նարինե Դուրգարյանը։

Դուրգարյանի կարծիքով՝ օրինագիծը ոչ միայն բանակին չի նպաստի, այլև գիտությունը կվերացնի։ Ըստ նրա՝ հայրենիքին ծառայելը միայն բանակում ծառայելը չէ, հայրենիքի պատիվը գիտությամբ բարձր պահելը ևս շատ կարևոր է։

«Սովորաբար ասում են, երբ ուսանողները գնում են բանակ ավելի իմաստուն են դառնում, խելքները գլուխներն են հավաքում, բայց նման բան չկա։ Եթե մարդը շատ լավ սովորել է դպրոցում, այնուհետև անվճար հիմունքներով ընդունվել է համալսարան և շարունակել է լավ սովորել, դա խոսում է այն մասին, որ նա նպատակ ունի գիտությամբ զբաղվելու։ Այդ մարդիկ ծառայելով բանակին ոչ մի օգուտ չեն տա, բանակից վերադառնալուց հետո կորցրած են լինելու ամեն ինչ, իսկ գիտությունը պահանջկոտ է, սիրում է ամենօրյա աշխատանք։ Օրինակ՝ նվագողը երկու տարի դադարից հետո կարո՞ղ է տաղանդավոր ջութակահար լինել կամ մարզիկն ինչպե՞ս կլրացնի դադարը»,- ասաց նա։

Անդրադառնալով՝ ՊՆ նախարարության այն հիմնավորմանը, թե տարկետումն օգտագործվում է բանակից խուսափելու համար, Դուրգարյանը նկատեց․ «Ոչինչ չի կարելի ընդհանրացնել։ Բացառություններ միշտ էլ կան։ Հնարավոր է՝ որոշ մարդիկ տարկետումն օգտագործում են բանակից խուսափելու համար, բայց դա բոլորին չի վերաբերում։

Մեզ մոտ տղաներ կան, ովքեր առաջին, երկրորդ կուրսից աշխատում են լաբորատորիաներում։ Մարդը, եթե իր ազատ ժամանակը դրան է տրամադրում, նշանակում է, որ ուզում է զբաղել գիտությամբ»,- եզրափակեց ԵՊՀ քիմիայի ֆակուլտետի օրգանական քիմիայի ամբիոնի վարիչը։

Դասախոսի կարծիքով՝ օրինագծի ընդունումը կնպաստի նաև արտագաղթին, քանի որ գիտությանը ձգտող մարդը այլ ելք չտեսնելով կհեռանա Հայաստանից:

Սոնա Հարությունյան