Դասադուլավորները հանդիպեցին ԿԳ նախարարի հետ (թարմացված)

Այսօր՝ նոյեմբերի 8-ին, ԵՊՀ ուսանողները շարունակում են բողոքի ակցիան` ընդդեմ տարկետման իրավունքի սահմանափակման: Մեծ թվով ուսանողներ հրաժարվել են մասնակցել դասերին և «տարկետում լինելու է, դասադուլ, միացում» վանկարկումներով կոչ են անում միանալ իրենց: Ի դեպ, այսօր նրանց են միացել նաև դասախոսական անձնակազմից:

Դասադուլավորները շարժվեցին դեպի Կրթության և գիտության նախարարություն՝ Լևոն Մկրտչյանին հանդիպելու և իրենց պահանջը ներկայացնելու նպատակով:

ԼՈւՐԵՐ.com-ի թղթակցի հետ զրույցում ՀՀ կրթության և գիտության նախարաի մամուլի խոսնակ Լուսինե Մարգարյանը նշեց, որ Լևոն Մկրտչյանը պատրաստ է ընդունել բողոքող ուսանողներին.

«Նախարարը նրանց նախորդ անգամ էլ էր հրավիրել, սակայն նրանք չեկան հանդիպման: Ի՞նչ կարող էր անել նախարարը: Հիմա էլ Լևոն Մկրտչյանը պատրաստ է ընդունել նրանց»,- ասաց ԿԳՆ մամուլի խոսնակը: 

Նշենք, որ «Հանուն գիտության զարգացման» նախաձեռնության անդամներից՝ Դավիթ Պետրոսյանը ներկայացրել էր Պաշտպանության նախարարության նախատեսած հանդիպմանն իրենց չմասնակցելու պատճառները: 

«Երեկ Պաշտպանության նախարարությունից մեզ զանգեցին ու ասացին՝ հանդիպում է նախատեսվում և բոլոր ԶԼՄ-ներին ուղարկվել է հաղորդագրություն, սակայն կան ԶԼՄ-ներ, որ հրավիրված չեն եղել: Այստեղ արդեն կա խնդիր, բայց ես չեմ ասում, որ մեզ մտադրված խաբել են, սակայն եթե ասում են բոլոր, ուրեմն պիտի լինեն բոլորը»,- նշել է նա:

Թարմացում.

Կրթության և գիտության նախարար Լևոն Մկրտչյանն ընդունեց տարկետման սահմանափակման դեմ բողոքող ուսանողների10 հոգանոց խմբին: Բավարարվեց ուսանողների պահանջը. հանդիպմանը ներկա էին նաև լրատվամիջոցների ներկայացուցիչները:

Ուսանողները նախարարին են ներկայացնում տարկետման ինստիտուտի փոփոխության հետ կապված իրենց մտահոգությունները, բարձրացրին նաև իրենց բողոքի ակցիան խոչընդոտելու՝ ֆակուլտետների դռները փակելու միջոցով ուսանողներին դուրս չթողնելու հարցը:

Նախարարը, սակայն հարցին հարցով պատասխանեց. «Դասապրոցես է ընթանում, դուք գտնում եք, որ դասընթացը պետք է ընդհատվի՞», - ասաց նախարարը:

Նա նշեց, որ երեկ հետևել է բողոքի ակցիային և թվեց մի քանի համալսարաններ, որոնք այն բաց են եղել:

Մկրտչյանը շեշտեց նաև, որ ուսանողության 90 տոկոսը գնում է բանակ և դա Հայաստանի անվտանգության մի մասն է՝ ասելով, որ «Պատիվ ունեմ» ծրագրով առաջարկվում է վերականգնել պահեստազորի սպա հասկացությունը, իսկ հայրենիքի առաջ պարտավորությունը բոլորի համար է:

Սոնա Հարությունյան