Թև ու թիկունք «Նովոները»

Վերլուծական 9 Նոյեմբեր, 2017 17:30

Օրերս մամուլում տեղեկություն տարածվեց, որ ՀՀ վերաքննիչ դատարանն արդարացրել է ապրիլի 2-ի ԱԺ ընտրությունների ժամանակ ընտրակեղծարարության փորձ արած ՀՀԿ-ական Աշոտ Կաղզվանցյանին: Կազվանցյանը մշտապես հայտարարել է, թե չի հիշել, որ մեկ անգամից ավել է քվեարկել: Մինչդեռ նա միշտ է աչքի ընկել բոլոր ընտրություններում հօգուտ իշխանությունների կեղծիքներ անելու սովորությամբ: Բացի այդ՝ Կաղզվանցյանի թիկունքում ԱԺ ՀՀԿ-ական պատգամավոր Նահապետ Գեւորգյանն է՝ Նովոն, քանի որ Կաղզվանցյանը վերջինի կնոջ ազգականն է: Ինքը՝ Գեւորգյանը, արդեն մի քանի գումարման ԱԺ պատգամավոր է, ու չնայած դրան՝ ոչ մի անգամ հանդես չի եկել օրենսդրական նախաձեռնությամբ։ Թերևս նրա ակտիվությունը սահմանափակվում է ընտրակեղծարար ազգականներին սահմանված պատժից ազատելով: Իսկ սա իր հերթին՝ փայլուն պայմաններ է ստեղծում հաջորդ ընտրություններում՝ ընտրակեղծարարների ազատ և անկաշկանդ գործելու համար: Կասկած անգամ չկա, որ նրանց թև ու թիկունք կդառնան «Նովոները» և մնացյալ կարկառուն հանրապետականները, արդյունքում՝ ինչքան ուզեն՝ այնքան էլ կխփեն: Այս դեպքը եզակի չէ: Սահմանադրական փոփոխությունների հանրաքվեի ընթացքում ՀԱԿ վստահված անձ Վարդան Հարությունյանին կաշառելու փորձի համար մեղադրվող` Երեւանի Կենտրոն վարչական շրջանի թաղապետարանի աշխատակից, թիվ 9/2 տեղամասային ընտրական հանձնաժողովի անդամ Զավեն Միրիջանյանը ևս դատարանի դահլիճում արդարացվեց՝ բավարար ապացույցներ չներկայացնելու հիմնավորմամբ: Խնդիրը, սակայն, բավարար ապացույցների բացակայության մեջ չէ։ Իշխանություններին չի էլ հետաքրքրում ճշմարտության փնտրտուքը, քանի որ նրանք այն գիտեն։ Դրա համար երկրում ստեղծվել է ճմարտության մերժման մի ամբողջ իրավաբանություն։

Իհարկե, անգամ այս դրվագներից հետո իշխանությունները կթմբկահարեն ազատ, արդար ընտրությունների մասին: Ինչպես երևում է՝ իշխանության ներսում, մասնավորապես՝ ՀՀԿ-ում, ընտրական գործընթացների հետ կապված աշխատանքի հստակ բաժանում կա։ Այսպես կոչված օլիգարխները՝ մականունավոր փողատերերը և հայերեն վատ խոսող կիսակրիմինալ դեմքերը զբաղված են բուն ընտրակեղծիքների կազմակերպման գործով, իսկ ուսյալ–կրթյալ ՀՀԿ–ականները՝ ընտրակեղծիքների «գաղափարական» հիմնավորմամբ, ընտրակեղծարարների փաստաբանությամբ և նրանց պատժից ազատելով:

Ստելլա Խաչատրյան