Ուղիղ եթեր. ԱԺ-ում գիշերով «հատուկ» նիստ են անում

ՀՀ ԱԺ Պաշտպանության և ազգային անվտանգության հարցերի մշտական հանձնաժողովում այս պահին նիստ է տեղի ունենում, որի ժամանակ քննարկվելու է նաև զինծառայության մասին օրենքի նախագծի 2-րդ ընթերցումը, որը առաջիկա լիագումար նիստին ներկայացվելու է օրակարգ:

ԼՈՒՐԵՐ.com-ը ներկայացնում է նիստը՝ ուղիղ միացմամբ:

Ավելի վաղ հայտնել էինք, որ Ազգային ժողովի պաշտպանության և անվտանգության հարցերի մշտական հանձնաժողովի նիստը չկայացավ քվորում չլինելու պատճառով: Հանձնաժողովի նախագահի տեղակալ, ՀՀԿ խմբակցության պատգամավոր Ալիկ Սարգսյանը հայտարարեց, որ նիստը հետաձգվում է, քանի որ հանձնաժողովի անդամների մեծ մասը նիստին չեն ներկայացել, ուստի այն չի կարող մեկնարկել: «Ես ստիպված եմ նիստը հետաձգել մինչև նոյեմբերի 13-ը, ժամը 11:00-ն: Օրակարգը չի փոխվում, քննարկելու ենք նույն հարցերը»,-  նշել էր Սարգսյանը:

Սակայն ՀՀ ԱԺ ղեկավարությունը, հղում անելով ՀՀ ԱԺ կանոնակարգ օրենքին, որոշում կայացրեց, որ նիստ այնուամենայնիվ տեղի կունենա և այսօր՝ 21:00-ին:

Նկատենք, որ գիշերով նման նիստ անցկացնելը հավանաբար քաղաքական քայլ է: Այս ժամին ուսանողները, որոնք բողոքի ակցիա են իրականցնում հենց այդ օրենքի դեմ, արդեն տանն են, և իշխող ՀՀԿ-ն հանձնաժողովի նիստն անցկացնում է ծածուկ:

Հավելենք, որ 18:00-ին տեղի ունեցած և քվորումի բացակայության պատճառով հետաձգված նիստին պետք է մասնակցեին նաև դասադուլ անող ուսանողները, որոնց սակայն չէին թույլատրել մասնակցել հարցի քննարկմանը: