«2 տարին իրականում շատ կարճ էր՝ մեծ փոփոխություններ իրականացնելու համար». Ալավերդու քաղաքապետը վայր դրեց լիազորությունները

Նոյեմբերի 5-ին հանրապետության 69 համայնքներում կայացան ՏԻՄ ընտրություններ, արդյունքում՝ ձևավորվեց 34 խոշորացված համայնք: Նոր համայնքապետ ու ավագանի ընտրեցին նաեւ Ալավերդիում, որտեղ համայնքապետի պաշտոնին հավակնում էր միայն մեկ թեկնածու՝ Լոռու մարզպետարանի աշխատակազմի ընտանիքի. կանանց եւ երեխաների պաշտպանության բաժնի պետ, ՀՀԿ կողմից առաջադրված Սասուն Խեչումյանը: Հենց նա էլ առաջիկա տարիներին կղեկավարի Ալավերդի համայնքը, որին խոշորացման արդյունքում միացել են Աքորի, Կաճաճկուտ, Ջիլիզա, Ծաղկաշատ և Հաղպատ գյուղերը: 

Նոյեմբերի 10-ը Ալավերդու գործող քաղաքապետ Կարեն Փարեմուզյանի՝ համայնքի ղեկավարի պաշտոնում աշխատելու վերջին օրն էր, ինչով էլ պայմանավորված էր համայնքապետարանի աշխատակազմի անդամների հետ վերջինիս անցկացրած հանդիպումը: Կարեն Փարեմուզյանը նախ շնորհակալություն հայտնեց ներկաներին՝ երկամյա արդյունավետ աշխատանքի համար, ապա հավելեց.

«Երկու տարի առաջ եկանք՝ Ալավերդի քաղաքում դրական փոփոխություններ անելու նպատակով: Մենք ուզում էինք հասնել նրան, որ ալավերդցին սոցիալապես կայուն կյանքով ապրի, մենք նպատակ ունեինք բնակչին սոցիալական օգնություն տալու փոխարեն աշխատատեղ ստեղծել: Սրա հետ կապված որոշակի աշխատանքներ արդեն իսկ արվել են: Երկու տարին իրականում շատ կարճ էր՝ մեծ փոփոխություններ իրականացնելու համար: Բայց հետ նայելով ու ամփոփելով այս երկու տարիները՝ ես տեսնում եմ, որ ձեզ հետ միասին մենք բավականին շատ դժվարություններ ենք հաղթահարել, հիմնականում ունենալով քիչ ռեսուրսներ՝ փորձել ենք ապահովել առավելագույն արդյունք:

Մենք իսկապես ծառայել ենք մեր ժողովրդին: Ես չեմ ուզում խոսել մեր թիմի կատարած աշխատանքների ու իրականացրած ծրագրերի մասին, որովհետև դա մեր պարտքն է եղել մեր համայնքի ու ժողովրդի առաջ, որը պատվով ենք կատարել»: 

Ամփոփելով հանդիպումը՝ Կարեն Փարեմուզյանը կրկին շնորհակալություն հայտնեց աշխատակազմի անդամներին՝ բարեխիղճ աշխատանքի և վստահության համար, ինչպես նաև հաջողություն մաղթեց հետագա աշխատանքում: Նաև նշեց, որ հնարավոր է՝ եղել են իր գաղափարների, ծրագրերի իրականացմանը չհավատացող կամ պարզապես այլ կերպ մտածող մարդիկ: Բայց դա չի խանգարել համայնքի առաջընթացին միտված համատեղ աշխատանքին: