ՀՀԿ-ի «տղերքը»...

Վերլուծական 11 Նոյեմբեր, 2017 19:15

Գեղարքունիքի մարզպետ Կարեն Բոթյանն, անդրադառնալով լրագրողների այն հարցին, թե ինչպե՞ս է վերաբերվում նրան, որ Ճամբարակի քաղաքապետ է ընտրվել ընտրակեղծարար Վազգեն Ադամյանը, պատասխանել է. «Ինչո՞ւ է ընտրակեղծարար ընտրվել, երիտասարդ տղա է ընտրվել, էլի մեր տղան ա, նորմալ է, կաշխատի՝ կտեսնենք: Ադամյան Վազգենն էլ մեր կուսակցության անդամն է, Ավանյան Յուրան էլ, հիմի պիտի մեկին աջակցեինք, Յուրային ենք աջակցել։ Յուրան չի անցել, անցել ա Ադամյան Վազգենը։ Ադամյան Վազգենն էլի մեր կուսակցական ընկերն ա, մեր հետ համագործակցել է, համագործակցում է և կհամագործակցի»։

Գաղտնիք չէ, որ իշխող ՀՀԿ-ի համար ընտրություններում բոլոր հնարավոր և անհնարին միջոցներով «ձայն քերողները», ոչ թե ընտրակեղծարարներ են, այլ «իրենց տղերքը»՝ նվիրյալ հանրապետականներ, որոնց օգնությամբ էլ իշխող կուսակցությունը դեռ իշխող է: Մի հարցում էլ մարզպետն ավելի քան ճիշտ է՝ Ադամյանի և նրա նմանների հետ համագործակցությունը շարունակելի է լինելու, ՀՀԿ-ն ո՛չ դասեր է քաղում, ո՛չ էլ հանրապետական մեծամասնությանը հուզում է հանրության կարծիքը՝ «իրենց տղերքի» գործած ապօրինությունների շուրջ: Չէ՞ որ այդ ապօրինություններն, ըստ հանրապետականների, գործվել են բացառապես հանուն ավելի լավ Հայաստանի:

Հիշեցնենք՝ նոյեմբերի 5-ին կայացած Գեղարքունիքի մարզի խոշորացված Ճամբարակ համայնքի ղեկավար է ընտրվել անկուսակցական Վազգեն Ադամյանը: Նա ստացել է 4349 քվե, իսկ մրցակից, գործող համայնքապետ Յուրիկ Ավալյանը, որին սատարում էր ՀՀԿ-ն, ստացել է 1424 քվե: Քաղաքապետի պաշտոնում ընտրված Վազգեն Ադամյանը այս տարվա հունիսի 13-ին մեղավոր է ճանաչվել քրեական օրենսգրքի 154-րդ հոդվածով (Քվեարկության գաղտնիությունը խախտելը) նախատեսված հանցանք կատարելու մեջ և Գեղարքունիքի մարզի ընդհանուր իրավասության դատարանը նրա նկատմամբ պատիժ էր նշանակել տուգանք՝ 500.000 դրամի: Նշենք, որ Վազգեն Ադամյանը «Գեգամետ Պլյուս» ՓԲԸ-ի ջարդիչ տեղամասի պետն է:

Ինչ խոսք, միայն Հայաստանում է, որ դատարանի դահլիճից կարելի է հայտնվել քաղաքապետի աթոռին՝ մի տեսակ Քաջ Նազարի բախտն է, բայց զարմանալու որևէ բան չկա. այդ քաջնազարությունը արդեն իսկ դարձել է ՀՀԿ-անների անփոխարինելի ձեռագիրը…

Ինքը՝ Բոթոյանն էլ, եթե հիշում եք, մինչ մարզպետ դառնալը խորհրդարանում տիտանական աշխատասիրությամբ և բուռն օրենսդրական գործունեությամբ աչքի չէր ընկել:

Ավելին՝ նա մեկն էր այն պատգամավորներից, ովքեր հինգ տարիների ընթացքում անգամ մեկ օրենսդրական նախաձեռնությամբ հանդես չէին եկել:

Ստելլա Խաչատրյան