Լոռու մարզպետին հաթաթա են տվել...

Լոռու մարզպետ Արթուր Նալբանդյանի գործերը անասելի վատացել են։ Ախթալայի քաղաքապետի ընտրություններից հետո ՀՀԿ վերնախավում զայրացած են մարզպետի վրա։ Բանն այն է, որ Ախթալայի գործող քաղաքապետ, ՀՀԿ թեկնածու Հայկազ Խաչիկյանը, ով կենսաթոշակների յուրացման գործով հայտնի Վազգեն Խաչիկյանի եղբայրն է, ընտրություններում պարտվել է անկուսակցական թեկնածուին։ Հաղթող՝ 1550 քվեով, ճանաչվել է Ճոճկանի արդեն նախկին ղեկավար, ինքնաառաջադրված Արկադի Թամազյանը: Իսկ 3-րդ տեղը զբաղեցրել է անկուսակցական Սուրեն Թամազյանը՝ 287 ձայն:

Հիշեցնենք, որ Հայկազ Խաչիկյանը Ախթալայի ղեկավարն է 2008թ.-ից, նրա քաղաքապետ դառնալու գործում ծանրակշիռ ազդեցություն է ունեցել Վազգեն Խաչիկյանը: ՀՀԿ-ում լուրջ կասկածներ կան, որ անկուսակցական թեկնածուն Ախթալայի քաղաքապետ է դարձել Լոռու մարզպետի գործուն աջակցությամբ։ Ինքը` Հայկազ Խաչիկյանն էլ հարազատ կուսակցությունում դժգոհել է, որ մարզպետը իր դեմ է աշխատել։ Ի՞նչն է հանրապետական էլիտային նման կերպ մտածելու առիթ տվել՝ դժվար է ասել, գուցե այն փաստը, որ մեկնաբանելով ՏԻՄ ընտրությունները մարզպետ Նալբանդյանը անչափ անթաքույց գոհունակություն էր արտահայտում դրանց արդյունքից, հայտարարելով՝ եթե նախորդ տարիների ՏԻՄ ընտրությունների հետ համեմատենք՝ այո՛, ինքը գոհ է, նույնիսկ շատ գոհ: Նալբանդյանի կարծիքով, Թամազյանի հաղթանակը պայմանավորված է նրանով, որ խոշորացված համայնքներում հնարավոր է՝ գյուղական համայնքի ղեկավարը հաղթի քաղաքի համայնքի ղեկավարին: Սրանով մարզպետը Խաչիկյանի պարտության պատասխանատվությունը դնում է կառավարության վրա՝ «համայնքները խոշորացրել եք, դե վայելեք պտուղները»: Զգալով կուսակցական վերնախավի դժգոհությունը Նալբանդյանն այժմ շտապում է իր լոյալությունը վերահաստատել՝ ամեն պատեհ և անպատեհ առիթներով գոհունակություն հայտնելով կառավարության աշխատանքներից և ինչպես ասում են՝ «ստրախովկայի» համար էլ հայտարարելով, որ երկրի միակ և անփոխարինելի առաջնորդը Սերժ Սարգսյանն է: Մարզպետին մնում է հուսալ, որ իր այս ջանքերը կգնահատվեն և Խաչիկյանի խայտառակ պարտության հարցն ու Նալբդանյանի հնարավոր «ներդրումը» այդ գործում շուտափույթ մոռացության կմատնվի…

Ստելլա Խաչատրյան