Կոսմետիկ միջոցների շուկայում հայտնաբերվել են խախտումներ

ՀՀ տնտեսական զարգացման և ներդրումների նախարարության Շուկայի վերահսկողության տեսչական մարմնի կողմից ընթացիկ տարում կոսմետիկ միջոցների շուկայում հայտնաբերվել են խախտումներ: Շուկայի վերահսկողության տեսչական մարմնի ղեկավար Լևոն Խալիկյանը նշեց, որ ուսումնասիրություն կատարած ընկերությունների գործունեության մեջ արձանագրվել է ապրանքի` առանց սերտիֆիկատի վաճառք:

«Այս տարի ուշադրության կենտրոնում է եղել կոսմետիկ միջոցների շուկան: Նախորդ տարիներին ունեցել ենք դիմում-բողոքներ այն մասին, որ կոսմետիկ միջոցների օգտագործումից հետո եղել է մաշկային ցան, ալերգիկ դրսևորում: Խնդրին անդրադարձել էր նաև մամուլը: Այս տարի ստուգում է իրականացվել առավել խոշոր ներկրողների մոտ: Նրանց 90 տոկոսի մոտ հայտնաբերվել է խախտում: Ապրանք վաճառել են առանց սերտիֆիկատի»,-ասաց Լևոն Խալիկյանը: Նրա խոսքով, սերտիֆիկատը միակ փաստաթուղթն է, որը հավաստում է  տվյալ արտադրանքի համապատասխան փորձարկում անցնելը և անվտանգ լինելը: Ուսումնասիրության արդյունքում ապրանքները ստուգվել են, դրանցում վտանգավոր նյութեր չեն հայտնաբերվել, սակայն ապրանքի վաճառքը կասեցվել է այնքան ժամանակ, մինչև  տնտեսավարողը ձեռք է բերել համապատասխան սերտիֆիկատ: Լևոն Խալիկյանը նշեց, որ եղել է մեկ տնտեսավարող սուբյեկտ, որի մոտ ոչ մի տիպի խախտում չի հայտնաբերվել: Կան հավատարմագրված լաբորատորիաներ, որոնց կողմից տրված փաստաթուղթը վկայում է, որ ապրանքը համապատասխանում է սահմանված չափանիշներին:

«Մինչև 2017 թվականը Հայաստանի Հանրապետությունում չէր գործում կոսմետիկ միջոցների տեխնիկական կանոնակարգ: 2017 թվականից ուժի մեջ է մտել ԵԱՏՄ-ի ընդունված կանոնակարգը, որի մասին տնտեսվարողը իրազեկվել է: Տեսչական մարմինը որդեգրել է այն մոտեցումը, որ ցանկացած ոլորտում ստուգում սկսելուց առաջ հանրային իրազեկում  իրականացնի աշխատակիցների համար: Այսինքն` բիզնեսմենը հրավիրվում է նախարարություն, քննարկվում են ոլորտում առկա բացերը, այնուհետև տնտեսավարողներին հորդորում ենք վերացնել դրանք: Որոշ ժամանակ անց, եթե խախտումը չի վերացվել, ապա տնտեսավարողը տուգանվում է: Մեր խնդիրն է, որ շուկան լինի ապահով և անվտանգ»,-հավելեց Լևոն Խալիկյանը: