Ում ուզում էին վնասել` վնասել են. Կարճաղբյուրի կրակոցների հետքերով

Նոյեմբերի 11-ին կրակոցներ են հնչել Գեղարքունիքի մարզի Կարճաղբյուր համայնքում:

Գյուղում ավտոմատից կրակել են Աբովյան քաղաքի բնակիչ, 33-ամյա Ռուբեն Կարապետյանին պատկանող КрАЗ մակնիշի 06 ՕԼ 803 համարանիշով ավտոմեքենայի վրա, որը տարիներ շարունակ կայանված է եղել իրենց գյուղում:

ԼՈՒՐԵՐ.com-ի թղթակցի հետ զրույցում Կարճաղբյուրի ղեկավար Տարոն Քոչարյանը դեպքից որոշ մանրամասներ մեզ պատմեց.

«Աբովյան քաղաքում գործող ընկերության մեքենա է: Տիրոջն անձամբ չեմ ճանաչում, բայց գիտեմ, որ «ԻՄՊԻԳՐԱ» ՓԲԸ-ի տնօրենն է: Մի քանի տարի առաջ մեր տարածքում հիդրոէլեկտրակայան էին ուզում կառուցել, մեքենան կանգնեցրին, որ աշխատանքներ տանեն ու այդպես մնաց մինչև հիմա: Այն վաղուց կայանված էր մեր գյուղի բնակիչ Արսեն Ավետիսյանին պատկանող մթերային խանութի մոտ: 

Վերջերս էլ եկել, նախապատրաստում էին ինչ-որ աշխատանքի համար ու երկու օր առաջ դեպքը կատարվեց»,- ասաց գյուղապետը: 

Ինչպես նշեց համայնքապետը՝ կատարվածի մեջ դիտավորություն կա. «Ում ուզում էին վնասել, վնասել են, թե ինչի նախանշան է և ինչ էին ուզում ասել՝ չեմ կարող ասել»,-նշեց Քոչարյանը:

Նշենք, որ Ռուբեն Կարապետյանը, ում պատկանում է կրակոցների ենթարկված մեքենան, «ԻՄՊԻԳՐԱ» ՓԲԸ շինարարական գործունեությամբ զբաղվող ընկերության տնօրեն է:

Տեղեկությունները, թե Ռ. Կարապետյանն աշխատում է «ԻՄՊԻԳՐԱ» ՓԲԸ-ի տնօրեն, փորձեցինք պարզել հենց ընկերությունից: Մեր հարցից անակնկալի եկած աշխատակիցը հաստատեց, որ Կարճաղբյուրում կրակոցների ենթարկված մեքենան պատկանում է ընկերության տնօրենին.

«Մեքենան թեև պատկանում է «ԻՄՊԻԳՐԱ» ՓԲԸ-ի տնօրեն Ռ. Կարապետյանին՝  որևէ կապ չունի «ԻՄՊԻԳՐԱ» ՓԲԸ-ի հետ և չի պատկանում ընկերությանը»:

Հավելենք, որ КрАЗ մակնիշի ավտոմեքենայից 3 մետր հեռավորության վրա հայտնաբերվել է 6 հատ 7.62 տարմաչափի /ԱԿՄ/ ինքնաձիգի կրակված պարկուճ, 2 հատ դատարկ գնդակի միջուկ, իսկ ավտոմեքենայի հովացման համակարգի վրա հայտնաբերվել են 7 հատ գնդակի վնասած հետքեր:

Սոնա Հարությունյան