Դատարանը մերժեց ՊՊԾ գնդի գրավման գործով մեղադրյալին ազատ արձակելու վերաբերյալ միջնորդությունը

Երևանի Շենգավիթ վարչական շրջանի ընդհանուր իրավասության դատարանում դատավոր Արթուր Օհանյանի նախագահությամբ  նոյեմբերի14-ին կայացավ Պարեկապահակային ծառայության գնդի գրավման  գործով առանձին վարույթով դատական նիստը: Այս գործով քննվում են մեղադրյալներ Արամ  Մանուկյանի,Հովհաննես Հարությունյանի, Թաթուլ Թամրազյանի, Արամ Հակոբյանի, Տիգրան Մանուկյանի, Արայիկ  Հակոբյանի, Վարդան Գերավետյանի, Մարտիրոս Հակոբյանի, Սերգեյ Կյուրեղյանի, Գևորկ Իրիցյանի և Թորոս Թորոսյանի մասով գործերը:

Մեղադրյալ Թորոս Թորոսյանի պաշտպան Լիպարիտ Սիմոնյանը դատարան ներկայացրեց իր պաշտպանյալին կալանքից անհապաղ ազատ արձակելու մասին միջնորդություն:

Պաշտպան Սիմոնյանի խոսքով՝  իր պաշտպանյալին կալանքի տակ պահելու կամ երկարաձգելու որևէ հիմք չկա:

Լիպարիտ Սիմոնյանը նշեց, որ իր պաշտպանյալի կալանքի երկարաձգումը չի խախտում ներպետական որևէ օրենք, սակայն խախտում է  Մարդու իրավունքների և հիմնարար ազատությունների պաշտպանության մասին եվրոպական կոնվենցիայի 5-րդ hոդվածի դրույթները: Միջնորդությանը միացան նաև մյուս պաշտպանները՝ նշելով, որ իրենք ևս հանդես կգան նմանատիպ միջնորդությամբ: Միջնորդությանը դեմ հանդես եկավ մեղադրող կողմը:

Խորհրդակցական սենյակից վերադառնալուց  հետո  դատավոր Օհանյանը նշեց, որ դատարանը որոշել է մերժել պաշտպան Սիմոնյանի կողմից ներկայացված միջնորդությունը:

«Քրեական դատավարության օրենսգրքի 138 հոդվածի 6-րդ կետի համաձայն  դատարանում գործի քննության ընթացքում մեղադրյալին կալանքի տակ պահելու առավելագույն ժամկետ չի սահմանվում: Բացի այդ,մեր օրենսդրությամբ կալանքի երկարացման  ինստիտուտը նույնպես սահմանված չի: Իսկ Թորոս Թորոսյանի կալանքը որպես խափանման միջոց փոփոխելու  մասով դատարանը որևէ հիմք չի տեսնում»,- ասաց դատավոր Օհանյանը: