ՀՅԴ-ի պահանջը՝ հայրենի կառավարությունից

Ազգային ժողովում Կառավարության բերած 2018 թ.-ի պետբյուջեի նախագծի պաշտպանության հերթը հասավ ՀՀԿ-ի կոալիցիոն գործընկեր ՀՅԴ-ի պատգամավոր Աղվան Վարդանյանին:

Պատգամավորն, ով նախապես իր ելույթը վերնագրել էր «Վճռականության պահանջ», ԱԺ գլխավոր ամբիոնից ներկաներին խորհուրդ տվեց մի կողմ թողնել զգացական, ամբոխավարական, կամ ինչ-ինչ պատճառներով նյարդային դարձածների գնահատականները և սևեռվել բյուջեի փիլիսոփայություն համարվող թվերի վրա: 

«2018 թ.-ին մենք ակնկալում ենք 4,5 տոկոս տնտեսական աճ, և այս բյուջեն նպատակ ունի նաև արտաքին պարտքը նվազեցնել: 2018 թ.-ի բյուջեն նախատեսում է 100 միլիարդ դրամի աճ: Շահարկվում են սոցիալական խնիրները, բնական է՝ եթե նպատակդ քննադատելն է, ապա պատճառներ միշտ կգտնես: Բայց պետք է ուշադրություն դարձնել որդեգրված ուղղությանը, ամրապնդել տնտեսության հիմքերն ու ապահովել սոցիալական արդարության հիմքերը»,-ասաց Վարդանյանը՝ պահանջներ ներկայացնելով Կառավարությանը: 

«Պետք չէ նայել կողքից՝ ինչ են ասում, կամ անում, կողքից նայողների գործը դա է լինելու, պետք է կառավարման արդյունավետությունը բարձրացնող կտրուկ, երբեմն՝ ցավագին բարեփոխումներ կատարել: Պետք է ուշադրություն դարձնել որակին, մեզ գրավական է պետք, որ եթե պետական երկու աշխատակցից մեկը կրճատվում է, ապա մնալու է որակյալը և ոչ թե սրա-նրա ծանոթը, կամ այս կամ այն կուսակցության անդամը»,-հայտարարեց Աղվան Վարդանյանը՝ հենց այս պահանջներն էլ համարելով ՀՅԴ-ի վճռականության պահանջն՝ ուղղված ՀՀ Կառավարությանն ու նրա ղեկավարին: 

Վերջում Աղվան Վարդանյանը հավելեց. «Դաշնակցությունը կողմ է քվեարկելու մեր Կառավարության այս բյուջեին»: