Հերթական սկանդալը՝ ՊՆ շուրջ. չարաշահումները շարունակվում են

Վերլուծական 16 Նոյեմբեր, 2017 16:00

ՀՀ քննչական կոմիտեի զինվորական քննչական գլխավոր վարչության հատկապես կարևոր գործերի քննության վարչությունում քննվող քրեական գործով բացահայտվել են զոհված կամ հաշմանդամ դարձած ազատամարտիկների ու զինծառայողների ընտանիքների բնակարանային պայմանների բարելավման նպատակով ՀՀ ՊՆ-ի կողմից դրամական միջոցներ հատկացնելու գործընթացում չարաշահումների մի շարք դեպքեր, պարզվել է դրանց մեխանիզմը։ 5 անձի առաջադրվել է մեղադրանք: Վերջին երկու շաբաթվա ընթացքում սա արդեն ՊՆ շուրջ երկրորդ խոշոր բացահայտումն է: Օրերս էլ Դատախազությունը քրեական գործ էր հարուցել ՊՆ Զինվորական հոսպիտալում ապօրինի աբորտներ կատարելու առթիվ: Դրանից առաջ էլ Քննչական կոմիտեն հետաքննություն էր սկսել՝ կապված ՊՆ-ում գնումների գործընթացի հետ:

Եթե չլիներ Ապրիլյան պատերազմը, դժվար է ասել, արդյո՞ք իշխանությունները կսթափվեին ու ձեռնամուխ կլինեին բացահայտումների՝ փորձելով պատժել այդ չարաշահումների անմիջական մասնակիցներին, թե՞ իրավիճակն, այնուամենայնիվ, կընթանար իր սահուն ընթացքով։ Ակնհայտ է, որ ՊՆ-ում բազմաթիվ չլուծված համակարգային խնդիրներ են կուտակվել, սակայն մինչ օրս ռազմական գերատեսչության ղեկավարությունն ադեկվատ լուծումներ չի առաջարկել, գուցե հենց դա է պատճառը, որ ՊՆ ներսում կատարվող իրադարձությունները դուրս են եկել գերատեսչության վերահսկողությունից՝ հատնվելով քննչական մարմինների ուշադրության կենտրոնում:

Ինչպես երեւում է՝ քառօրյա պատերազմն արագացրեց բանակի հաշվին հարստացողների դեմ սկսված արշավը: Նախ՝ ապրիլի 26-ին Սերժ Սարգսյանն աշխատանքից հեռացրեց երեք գեներալների` ՀՀ զինված ուժերի գլխավոր շտաբի հետախուզության վարչության պետ գեներալ-մայոր Արշակ Կարապետյանին, ԶՈւ կապի զորքերի պետ, կապի եւ ավտոմատացված կառավարման համակարգերի վարչության պետ Կոմիտաս Մուրադյանին, ՀՀ պաշտպանության նախարարի տեղակալ-նյութատեխնիկական ապահովման դեպարտամենտի պետ Ալիկ Միրզաբեկյանին: Բայց նրանցով չսահմանափակվեց ՊՆ աղմկոտ պաշտոնանկությունների եւ ձերբակալությունների շարքը: «Խոշոր ձկներին» հեռացրին աշխատանքից, սակայն քրեական պատասխանատվության չենթարկեցին, իսկ «քավության նոխազ» դարձան «մանր եւ միջին ձկները»` հայտնվելով ճաղերի հետեւում: Կարծես թե նույն պատկերին էլ այսօր ենք ականատես լինում: Իհարկե, Պնախարար Վիգեն Սարգսյանը կարող է կուլիսներում սուր ճոճել, թե պայքարում է ՊՆ կոռուպցիոն դրսեւորումների դեմ, այնուամենայնիվ, բոլորի համար էլ հասկանալի է, որ թույլատրվում է «պայքարել» խիստ որոշակի միջավայրում, որն ավարտվում է միայն «մանր ու միջին» տրամաչափի պաշտոնյաների տիրույթում: Ու շատ հաճախ ազատազրկվում են մարդիկ, ովքեր միանձնյա չեն գործել կոռուպցիոն բուրգում: Ուստի՝ անարդար է «խոշորներին» շրջանցելով՝ մանրերին կամ միջիններին որսալը:

Ստելլա Խաչատրյան