Կառավարության «նվերը» մարզային հեռուստաընկերություններին...

Վերլուծական 23 Նոյեմբեր, 2017 18:20

ՀՀ կառավարությունը նոյեմբերի 16-ի նիստում հավանություն է տվել «Հեռուստատեսության և ռադիոյի մասին» նոր օրենքի նախագծին և հարակից օրենսդրության մեջ լրացումներ կատարելու օրինագծերի փաթեթին ու որոշել է սահմանված կարգով դրանք ներկայացնել Ազգային ժողով։ Քաղաքացիական հասարակության ներկայացուցիչները, հասարակական կազմակերպությունները մտահոգություն են հայտնել այն առիթով, որ իշխանությունը խիստ գաղտնի պայմաններում մշակում և խորհրդարան է ուղարկում կարևոր օրենքի նախագիծ՝ առանց քաղաքացիական հասարակության կառույցներին այդ գործընթացում ներգրավելու և նրանց հետ որևէ քննարկում անցկացնելու։ Սա, ըստ փորձագետների՝ մեդիա ոլորտի ամենաանհաջող օրենքներից մեկն է, որը բավականին վիճահարույց է, լուրջ հարցեր է իր մեջ պարունակում։

Եթե լինի քաղաքական կամք, Հայաստանում նույնպես հեռարձակման ոլորտի բոլոր խնդիրները կլուծվեն։ Դեռ հավատում ենք, որ ապրում ենք ժողովրդավարական պետությունում, և որ կառավարության այս քայլը քաղաքական որոշում չէ, այլ պարզ թերացում, քանի որ ԱԺ ուղարկված օրենքի նախագիծը հեռու է ոլորտի կարգավորումից: Այն լուծում չի տալիս մի շարք կարևոր խնդիրների․ մասնավորապես, չլուծված է մնում կարգավորող մարմնի՝ Հեռուստատեսության և ռադիոյի հանձնաժողովի, ինչպես նաև Հանրային հեռուստառադիոընկերության խորհրդի անկախության խնդիրը։ Թեև օրինագիծը նոր Սահմանադրությանն է համապատասխանեցնում հանձնաժողովի և խորհրդի անդամների ընտրությունը՝ մի դեպքում դա վերապահելով Ազգային ժողովին, իսկ մյուս դեպքում՝ վարչապետի որոշմամբ հաստատված մրցութային կարգին, հազիվ թե տարբեր որոշումներ լինեն; Հեռուստատեսության և ռադիոյի ազգային հանձնաժողովը ձևավորում էր այս դաշտը իշխող քաղաքական ուժին հարմար ձևով: Եվ այդ նույնը հիմա, փաստորեն, կատարելու է իր մեծամասնությամբ՝ Ազգային ժողովը: Օրենքի նախագծով՝ դարձյալ պահպանվել են թվային հեռարձակման մասնավոր ցանցի (մուլտիպլեքս) ստեղծման համար առաջադրված չափազանց բարդ և հսկայական ներդրումներ պահանջող պայմանները: Որպես հետևանք՝ մասնավոր մուլտիպլեքս որևէ մեկը չի ցանկանում ստեղծել, արդեն երկու տարի է՝ հայտարարված մրցույթին մասնակցող չկա, իսկ մարզերում գործող 10-ից ավելի տեղական հեռուստաընկերությունները դուրս են մնացել թվայնացման գործընթացից, շարունակում են գործել անալոգային ռեժիմով՝ կորցնելով լսարանն ու հայտնվելով փակման վտանգի առջև:

Ստելլա Խաչատրյան