Երկար ժամանակ է՝ չեմ պարում գիշերային ակումբում. Կայա Խուրշուդյան

Life.panorama.am-ը գրում է.

Կայքի  զրուցակիցն է դերասանուհի Կայա Խուրշուդյանը: Մեզ հետ զրույցում Կայան պատմեց այլևս գիշերային ակումբում չաշխատելու, միայն կենդանիների խնամքով զբաղվելու և իր երազանքների ընտանիքն ունենալու մասին:

«Հինգ տարի անքուն գիշերներ ու  չսիրած աշխատանք՝ կարծում եմ, որ բավական էր, ժամանակն էր վայելել իրական երջանկությունը, որն այսօր ունեմ: Գուցե շատերը տեղյակ չեն, բայց արդեն երկար ժամանակ է, ինչ չեմ պարում գիշերային ակումբում: Այս որոշումը կայացրի, քանի որ հասկացա, որ ժամանակն է հրաժարվել իմ չսիրելի աշխատանքից և նվիրվել միայն ընտանիքիս»,- նշեց Կայան, իսկ հարցին, թե ինչպե՞ս է հոգում խնդիրները, եթե չի աշխատում, պատասխանեց.

«Ես բավականաչափ աշխատել եմ, որ այսօր այլևս չաշխատեմ: Հիմա ապրում եմ կյանքիս լավագույն ժամանակահատվածը: Իմ նպատակն էր ապրել ընտանեկան կյանքով և այսօր համարյա թե հասել եմ դրան, ինձ այլև ոչինչ պետք չէ, պետք է միայն ընտանեկան ջերմ կյանք»:

Ամուսնու մասին խոսելիս՝ դերասանուհին նշեց.

«Սիրում եմ և սիրված եմ, իսկ դա մեծ երջանկություն է: Ամուսնուս հաշված օրեր են մնացել, որ ազատության մեջ հայտնվի: Առջևում մեզ էլ ավելի երջանիկ կյանք է սպասվում: Հիմա երազում եմ սիրածս տղամարդուց կրկին երեխաներ ունենալ, հուսամ՝ Աստված ինձ շատ բալիկներ կպարգևի»:

Այժմ Կայան իր ողջ ուշադրությունը սևեռել է իր կենդանիների վրա.

«Մեր տանը երկու շուն և մեկ կապիկ է բնակվում: Նրանց խնամքով բացառապես ես եմ զբաղվում, որն, ի դեպ, այնքան էլ հեշտ գործ չէ, բայց, երբ սիրով ես անում, ամեն ինչ հաճելի է թվում: Օրական երկու ժամ շունիկներիս եմ հանում զբոսանքի, ապա զբաղվում նրանց կերակուրներով, մաքրությամբ, դրան զուգահեռ խստագույնս հետևում եմ նաև տան հիգիենային, քանի որ տանը կենդանիներ ունենալն այնքան էլ հեշտ չէ: Պետք է վստահեցնեմ նաև, որ շատ ուշադիր եմ կենդանիներիս առողջությանը, նրանք ունեն իրենց անասնաբուժերը, ժամանակին ստանում են պատվաստումները, մշակվում եղունգները, ատամները և այլն»,- պատմեց նա:

Նյութը՝ սկզբնաղբյուր կայքում