Ամաչե՛ք, որ Ձեր պատմությունը չգիտեք. Բաբայանը՝ դատախազին

Կենտրոն և Նորք-Մարաշ վարչական շրջանների ընդհանուր իրավասության դատարանում այսօր` նոյեմբերի 27-ին, շարունակվեց  Սամվել Բաբայանի և մյուսների գործով դատաքննությունը: Պաշտպանները կշարունակեն հանդես գալ ճառերով:

Նախորդ նիստին Սամվել Բաբայանի փաստաբան Ավետիս Քալաշյանը հայտարարել էր, որ իր պաշտպանյալին առաջադրված մեղադրանքներն անհիմն են: Նրա խոսքով, ամբաստանյալ Սանասար Գաբրիելյանը բազմիցս ասել է, որ բանակի համար նպատակ է ունեցել ձեռք բերել Իգլա տեսակի զենիթահրթիռային համալիր՝ իր սեփական միջոցներով, եւ զենքի համար գումար Բաբայանը չի տրամադրել:

ԼՂՀ պաշտպանության բանակի նախկին հրամանատար Սամվել Բաբայանն ընդգծեց, որ ինքը հանցանք չի կատարել և պետք չէ իրեն արդարացնել. «Ինձ արդարացնելն իմաստ չունի: Ես մի երկու բառով կներկայացնեմ կատարվածը, եթե իմ մասնագիտությանը կամ իմ 9 տարվա ղեկավարությանը ինչ-որ մարդ կասկածում է: Ես կապ չունեմ ոչ «Իգլա» տեսակի զենիթահրթիռային համակարգի տեղափոխման, և ոչ էլ «փողերի լվացման» հետ:

Կրիմինալ ոչ մի քայլ չեմ արել ու ստացել եմ ինձ պարտք գումարը: Ասել եմ, թե ումից եմ ստացել գումարը և ինչ ճանապարհով: Ութ ամիս ես Հայաստանից չեմ փախել ու չեմ խուսափել ցուցմունք տալուց»,- նշեց նա՝ ասելով, որ ինքն Արցախի հերոս է, մինչդեռ մեղադրող դատախազը  դրան չի անդրադառնում:

«Ամաչե՛ք, որ Ձեր պատմությունը չգիտեք»,- նկատեց Բաբայանը:

Նշենք, որ Արմեն Պողոսյանին էլ մեղադրանք է առաջադրվել  այն բանի համար, որ նա մի խումբ անձանց հետ` նախնական համաձայնությամբ, ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահրթիռային համալիր:

Ժորա Զաքարյանին և Դավիթ Հարությունյանին, Կարեն և Անդրանիկ Քոչարյաններին մեղադրանք է առաջադրվել ՀՀ քրեական օրենսգրքի 38-190-րդ հոդվածի 1-ին մասով, իսկ Արմեն Պողոսյանին՝ 235-րդ հոդվածի 2-րդ մասով:

Նշենք, որ հանցավոր ճանապարհով ստացված գույքն օրինականացնելու (փողերի լվացում), ինչպես նաև ապօրինի կերպով ռազմամթերք ձեռք բերելու, պահելու և փոխադրելու գործով անցնում են 7 մեղադրյալ, և նրանցից երեքը՝ Սամվել Բաբայանը, Սանասար Գաբրիելյանը և Արմեն Պողոսյանը գտնվում են կալանքի տակ, իսկ մյուս չորսի նկատմամբ որպես խափանման միջոց է ընտրված չհեռանալու մասին ստորագրություն: