Ֆոտոլրագրող Գագիկ Շամշյանին կանչում են դատարան` լուսանկարը «հերքելու» (ֆոտո, տեսանյութ)

«Առավոտ» օրաթերթը գրում է. «Եղվարդի խճուղի 1 հասցեով ստացվել է խորհրդավոր մի ծրար։ Այն ուղարկվել էր Արաբկիր եւ Քանաբեո-Զեյթուն վարչական շրջանների ընդհանուր իրավասության դատարանի կողմից։ Ծրարը բացելուց հետո այն փոխանցվել է «Առավոտ» օրաթերթին։ Ինչո՞ւ թերթին, որովհետեւ այնտեղ է եղել մեր ֆոտոլրագրողի՝ Գագիկ Շամշյանի անունը։

 Դատավորի գործավար Ա. Հասրաթյանի ստորագրությամբ դատական ծանուցագիր է ուղարկվել։ Անկեղծ ասած պարզ չէ, թե ո՞ր դատավորի օգնականն է Ա. Հասրսսթյանը։ Ըստ այդ ծանուցագրի' տեղեկացվում է, որ Գագիկ Շամշյանը դեկտեմբերի 7-ին հրավիրվում է նշյալ դատարան, քանի որ նշանակվել է դատական նիստ։ Ծանուցագրում նշվում է նաեւ հայցվորի մասին' Արամ Չատինյանի։ Պարզ չէ, թե ինչո՞ւ ծանուցագրի հետ չի ուղարկվել հայցադիմումը։ Համաձայն ՀՀ քաղաքացիական դատավարության օրենսգրքի 95 հոդվածի 1-ին կետի' պատասխանողը հայցադիմումը վարույթ ընդունելու մասին որոշումը ստանալուց հետո երկշաբաթյա ժամկետում դատարան պետք է ուղարկի հայցադիմումի պատասխանը։ Այլապես, «պատասխան չներկայացնելը դատարանը կարող է գնահատել որպես պատասխանողի կողմից հայցվորի վկայակոչված փաստերի ընդունում»։ Ծանուցագիրը չի «օգնում» հասկանալու, թե ֆոտոլրագրողը ո՞ր լրատվամիջոցի հետ կապված է «հրավիրվում» դատարան, ո՞վ է վարույթ ընդունել գործը, հայցապահանջում ի՞նչ է ներկայացվել, որպեսզի աոարկենք, շամշյանական լուսանկարներից ո՞րը պիտի «հերքենք», լրատվությո՞ւնը, որտե՞ղ հրաուարակված, քանի որ ֆոտոլրագրողը միաժամանակ համագործակցում է մի քանի հայաստանյան լրատվամիջոցների հետ։

Դատարանի կողմից պատշաճ ծանուցվելու դեպքում Շամշյանն իր ներկայացուցչի հետ կհայտնվի դատարանում»։

Նշենք, որ ֆոտոլրագրող Գագիկ Շամշյանի ենթադրությամբ, դատական հայցի համար հիմք է հանդիսացել «Դատարան է բերվել Օդեսայում 3 հայի վրա կրակած, Կադաստրի պետի տեղակալի եղբայրը (ֆոտո, տեսանյութ)» վերտառությամբ հոդվածը:

Լուրի բովանդակությունը հետևյալն էր.

«Օգոստոսի 20-ին՝ ժամը 10:20-ի սահմաններում, ոստիկանության կազմակերպված հանցավորության դեմ պայքարի գլխավոր վարչության (6-րդ վարչություն) աշխատակիցները ոստիկանության Երևան քաղաքի վարչության ձերբակալվածների պահման վայրից Երևանի Կենտրոն-Նորք-Մարաշ վարչական շրջանների ընդհանուր իրավասության դատարան բերեցին մի տղամարդու:

Ինչպես դատարանից News.armeniatv.com–ին հայտնում է ֆոտոլրագրող Գագիկ Շամշյանը, նշված երիտասարդը 40-ամյա Տիգրան Չատինյանն է, ով բնակվում է Այգեձոր 63 տանը:

Նրան օգոստոսի 17-ին ոստիկանության ԿՀԴՊ գլխավոր վարչության քրեական հետախուզության վարչության (6-ի քրեական) աշխատակիցները բերման են ենթարկել Թումանյան-Հյուսիսային պողոտա փողոցների խաչմերուկից:

Ֆոտոլրագրող Գագիկ Շամշյանը հայտնեց, որ Տ. Չատինյանը 2005թ. դեկտեմբերի 20-ից միջպետական հետախուզման մեջ է գտնվում Ուկրաինայի Հանրապետության Օդեսայի մարզի Մարինովսկի ոստիկանության բաժնի կողմից՝ Ուկրաինայի քրեական օրենսգրքի 115 հոդվածի 2-րդ մասի (դիտավորյալ սպանություն) հատկանիշներով:

Ըստ ֆոտոլրագրողի՝ 2005թ. նա իր ընկերոջ' նույնպես հետախուզման մեջ գտնվող Վաղարշակ Մուրադյանի հետ Օդեսայում գտնվող «Գլորիա» ակումբում հրազենային կրակոցներ են արձակել այնտեղ գտնվող Արարատի մարզի Մխչյան գյուղի բնակիչներ' եղբայրներ 40-ամյա Համիկ Գեղամյանի, 35-ամյա Ռոբերտ Գեղամյանի և 49-ամյա Մխիթար Գեղամյանի վրա: Կրակոցների արդյունքում Համիկը մահացել էր, իսկ Ռոբերտն ու Մխիթարը հրազենային վնասվածքներ էին ստացել:

Պարզվել էր, որ Համիկի և Մխիթարի վրա կրակոցներն արձակել էր Տիգրանը, իսկ Ռոբերտի վրա՝ Վաղարշակը՝ «Մակարով» տեսակի ատրճանակով: Հրազենային վնասվածքներ էր ստացել նաև «Գլորիայում» գտնվող 30-ամյա մի մոլդովացի տղամարդ:

Քիչ առաջ դատարանում ընթացող դռնփակ դատական նիստը ավարտվեց:

Դատավոր Գագիկ Ավետիսյանը անցել է խորհրդակցական սենյակ՝ վճիռ կայացնելու համար: Մինչ դատավորը դուրս կգա խորհրդակցական սենյակից, դատարանի բակում են հավաքվել հայերի վրա կրակած Տիգրանի հարազատները:

Այստեղ են գտնվում Տիգրանի եղբայրը՝ Արամ Չատինյանը, ով աշխատում է որպես Արաբկիրի կադաստրի պետի տեղակալ և Ներքին գործերի Սպանդարյանի, իսկ հետո Կենտրոնականի, Մասիսի բաժինների պետ Սամվել Ռշտունին:

Դատարանի բակում հավաքվածները խոսում էին, որ «ոչ մի խնդիր չկա, վերևներով հարցերը լուծել ենք, մեր ախպերը դատարանից ազատ է արձակվելու»:

Քիչ առաջ դատավոր Գագիկ Ավետիսյանը, վերադառնալով խորհրդակցական սենյակից, որոշեց բավարարել քննչական մարմնի միջնորդությունը և Տ.Չատինյանի նկատմամբ որպես խափանման միջոց կիրառել 40-օրյա կալանքը:

Չատինյանը տեղափոխվեց «Նուբարաշեն» ՔԿՀ»:

Լուսանկարները և տեսանյութը` Գագիկ Շամշյանի