Սերժ Սարգսյանի եղբորորդին անցնում է ապօրինի ծագման գույքի բռնագանձման գործով

ՀՀ 3-րդ նախագահ Սերժ Սարգսյանի եղբորորդի Նարեկ Սարգսյանն անցնում է ապօրինի ծագման գույքի բռնագանձման գործով։ Այս մասին ԼՈՒՐԵՐ.com-ը  տեղեկանում է «Ազդարար» պաշտոնական հայտարարությունների պետական համակարգից: ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Նարեկ Սարգսյանին պատկանող գույքի առնչությամբ իրականացվել է ուսումնասիրություն և կազմվել ամփոփագիր, հրավիրել նրան ծանոթանալու այդ նյութերին։

Ապօրինի ծագման գույքի բռնագանձման գործով անցնում է նաև քրեական հեղինակություն Արամ Վարդանյանը, որը հանրության շրջանում առավել հայտնի է Վստրեչի Ապեր մականունով։ Ծանուցագրեր են հասցեագրվել նաև վերջինիս զավակներին՝ Կարեն և Ելենա Վարդանյաններին։ 

«Ազդարար»-ից հնարավոր է տեղեկանալ, թե հանրությանը հայտնի որ անձանց գույքն է հայտնվել  դատախազության խոշորացույցի տակ։ Ըստ այդմ՝ ապօրինի գույքի բռնագանձման գործընթացում ներգրավված են նախկին ոստիկանապետ Վլադիմիր Գասպարյանն ու նրա ընտանիքի անդամները, ԱԱԾ հակահետախուզության դեպարտամենտի իրավապահ համակարգի սպասարկման և վերահսկման բաժնի պետ Սերոբ Հարությունյանը, ԱԺ նախկին նախագահ Գալուստ Սահակյանի որդին՝ պետական գույքի կառավարման կոմիտեի նախկին ղեկավար Արման Սահակյանն ու նրա կինը, բնապահպանության նախկին նախարար Արամ Հարությունյանը։ 

Նշենք, որ ավելի վաղ ապօրինի ծագման գույքի բռնագանձման գործով ծանուցագիր էր ուղարկվել նաև Նարեկ Սարհսյանի քրոջը՝ Անի Սարգսյանին։ 
Հիշեցնենք, որ 2020-ի ապրիլին խորհրդարանն ամբողջությամբ ընդունեց ապօրինի ծագման գույքի բռնագանձման մասին օրենքը։ Այս տարվա հունիսի տվյալներով բացահայտվել է ենթադրաբար ապօրինի ծագում ունեցող 20 անշարժ ու 5 շարժական գույք։