Պարզվել է Զարուհի Փոստանջյանի ամուսնու մեքենան պայթեցնողի ինքնությունը

«Երկիր ծիրանի» կուսակցության առաջնորդ Զարուհի Փոստանջյանի ամուսնու՝ ատամնաբույժ Սուրեն Դրամփյանի «Mercedes» մակնիշի ավտոմեքենան պայթեցնելու դեպքի վերաբերյալ հարուցվել է քրեական գործ: Այս մասին ԼՈՒՐԵՐ.com-ի հետ զրույցում ասաց ՔԿ մամուլի քարտուղար Վարդան Թադևոսյանը:

«Քրեական գործ է հարուցվել 185 հոդվածի 2-րդ մասի 1-ին և 2-րդ կետով՝ գույքը դիտավորությամբ ոչնչացնելու կամ վնասելու հոդվածով: Իսկ թե ով է մեքենան պայթեցրել, դեռ չգիտենք: Նախաքննությունը շարունակվում է»,- ասաց Վարդան Թադևոսյանը:

Ըստ տեղեկությունների՝ ոստիկանությունը պարզել է, որ նշված հանցագործությունը կատարել է Վաղարշապատում բնակվող Մելսիկ Պ.-ն

Հիշեցնենք, օգոստոսի 5-ին Արաբկիր վարչական շրջանում պայթեցրել են «Երկիր ծիրանի» կուսակցության առաջնորդ Զարուհի Փոստանջյանի ամուսնու՝ ատամնաբույժ Սուրեն Դրամփյանի «Mercedes» մակնիշի ավտոմեքենան։ Այն կայանված է եղել իրենց շենքի բակում։