ՊԵԿ պաշտոնատար անձինք կաշառք են վերցրել․ պետբյուջե չեն վճարվել ավելի քան 73 մլն դրամի հարկեր

ՀՀ պետական եկամուտների կոմիտեում հարուցված եւ ՀՀ հատուկ քննչական ծառայությունում քննված քրեական գործի նախաքննությամբ բացահայտվել են մեծ քանակությամբ տարբեր տեսակի ապրանքների` Վրաստանից ՀՀ տարածք ապօրինի ներկրման, ինչպես նաեւ ՊԵԿ պաշտոնատար անձանց կողմից խոշոր չափերով կաշառք ստանալու, պաշտոնեական լիազորությունները չարաշահելու, պաշտոնեական անփութության, ապրանքների անօրինական ներկրմամբ զբաղվող անձին օժանդակելու դեպքեր, որոնց հետեւանքով պետական բյուջե չեն վճարվել առանձնապես խոշոր չափերի` ավելի քան 73 մլն ՀՀ դրամի հարկեր, տուրքեր եւ պարտադիր այլ վճարներ: Այս մասին  տեղեկացնում են Հատուկ քննչական ծառայությունից։

Մասնավորապես, քրեական գործի նախաքննությամբ պարզվել է, որ ապրանքների անօրինական ներկրմամբ զբաղվող Լեւոն Ավագյանը 2019թ. դեկտեմբերից 2020թ. մարտն ընկած ժամանակահատվածում` 4 վարորդների օժանդակությամբ, առանց մաքսային հայտարարագրման եւ համապատասխան մաքսային ձեւակերպումների, Բագրատաշենի մաքսակետով Վրաստանից Հայաստանի Հանրապետություն է ներկրել ընդհանուր 9 բեռնատար սննդամթերք եւ ավտոյուղեր: Այդ ընթացքում Բագրատաշենի մաքսակետի ուղեփակոցում ծառայություն իրականացնող մաքսային տեսուչ Հայկ Մարտիրոսյանը, չկատարելով իր ծառայողական պարտականություները, ապրանքների վերաբերյալ մաքսային հայտարարագիր ներկայացված չլինելու պայմաններում թույլատրել է Լ. Ավագյանին պատկանող բեռների ապօրինի ներկրումը ՀՀ տարածք:

Քննությամբ հիմնավորվել է նաեւ, որ Բագրատաշենի մաքսակետի կշեռքավար Տիգրան Ավետյանը հանցավոր համաձայնության է եկել Լեւոն Ավագյանի հետ` վերջինիս կողմից ապրանքներն առանց հայտարարագրման ներկրելուն օժանդակելու, ինչպես նաեւ մաքսատան տեսուչի կողմից Լ. Ավագյանից խոշոր չափերով կաշառք ստանալուն օժանդակելու հարցերում: Մասնավորապես` Տիգրան Ավետյանը բեռների անօրինական ներկրումներին օժանդակելուց հետո Լեւոն Ավագյանից ընդհանուր շուրջ 6000 ԱՄՆ դոլար կաշառքի գումարներ է վերցրել եւ փոխանցել մաքսատան պաշտոնատար անձին:   Տ. Ավետյանը հերթական` 800 ԱՄՆ դոլար կաշառքի գումարը չի հասցրել վերցնել եւ փոխանցել մաքսային տեսուչին` իրավապահ մարմինների կողմից հանցագործության դեպքը բացահայտվելու պատճառով:

Բացի այդ, Բագրատաշենի մաքսակետի հերթափոխի պետ Վոլոդյա Ասատրյանը, իր հերթին, ծառայության նկատմամբ ցուցաբերելով անբարեխիղճ եւ անփույթ վերաբերմունք, Լ. Ավագյանի կողմից վերը նշված ապօրինի ներկրումներ կատարելու օրերին իր ղեկավարած հերթափոխում ընգրկված կշեռքավարի եւ մաքսային տեսուչի գործունեության նկատմամբ վերահսկողական գործառութային պարտականությունները կատարել է ոչ պատշաճ, ինչն անզգուշությամբ առաջացրել է ծանր հետեւանքներ:

Նկարագրված հանցավոր արարքների հետեւանքով պետությանը պատճառվել է առանձնապես խոշոր չափերի` ավելի քան 73 մլն դրամի վնաս, որի մի մասը նախաքննության ընթացքում վերականգնվել է, իսկ մնացած մասի չափով արգելանք է դրվել մեղադրյալներին պատկանող գույքի վրա: Քրեական գործի շրջանակներում մեղադրանք է առաջադրվել`

Լեւոն Ավագյանին՝ ՀՀ քրեական օրենսգրքի 205րդ հոդվածի 1ին մասի 2րդ կետով /6 դրվագ/, 205րդ հոդվածի 2րդ մասով եւ ՀՀ քրեական օրենսգրքի 312րդ հոդվածի 2րդ մասով /8 դրվագ/,

Արթուր Տիրացվյանին՝ ՀՀ քրեական օրենսգրքի 38205րդ հոդվածի 1ին մասի 2րդ կետով /5 դրվագ/,

Ամատուն Ենոքյանին` ՀՀ քրեական օրենսգրքի 38205րդ հոդվածի 1ին մասի 2րդ կետով,

Վահան Սահակյանին` ՀՀ քրեական օրենսգրքի 38205րդ հոդվածի 1ին մասի 2րդ կետով,

Էդգար Ավետիսյանին՝ ՀՀ քրեական օրենսգրքի 38205րդ հոդվածի 1ին մասի 2րդ կետով,

Վոլոդյա Ասատրյանին՝ ՀՀ քրեական օրենսգրքի 315րդ հոդվածի 1ին մասով եւ ՀՀ քրեական օրենսգրքի 315րդ հոդվածի 2րդ մասով /7 դրվագ/,

Հայկ Մարտիրոսյանին՝ ՀՀ քրեական օրենսգրքի 308րդ հոդվածի 2րդ մասով, ՀՀ քրեական օրենսգրքի 308րդ հոդվածի 1ին մասով /6 դրվագ/, ՀՀ քրեական օրենսգրքի 38205րդ հոդվածի 2րդ մասով եւ ՀՀ քրեական օրենսգրքի 38205րդ հոդվածի 1ին մասի 2րդ կետով /5 դրվագ/,

Տիգրան Ավետյանին՝ ՀՀ քրեական օրենսգրքի 38311րդ հոդվածի 3րդ մասի 3րդ կետով /8 դրվագ/, ՀՀ քրեական օրենսգրքի 38205րդ հոդվածի 1ին մասի 2րդ կետով /6 դրվագ/ եւ ՀՀ քրեական օրենսգրքի 38205րդ հոդվածի 2րդ մասով:

Վերը նշված մեղադրյալների վերաբերյալ քրեական գործի նախաքննությունն ավարտվել է: Գործը մեղադրական եզրակացությամբ հանձնվել է հսկողություն իրականացնող դատախազին` այն հաստատելու եւ դատարան ուղարկելու միջնորդությամբ: