Ավտոառևանգողին վնասազերծելու համար ոստիկանները հրազեն են կիրառել (ֆոտոշարք, տեսանյութ)

Այսօր՝ դեկտեմբերի 12-ին, ավազակային հարձակում է տեղի ունեցել Լոռու մարզում: Ինչպես դեպքի վայրից ԼՈՒՐԵՐ.com-ին հայտնում է ֆոտոլրագրող Գագիկ Շամշյանը, դեկտեմբերի 12-ին, ժամը 00.10-ի սահմաններում, Վանաձորի շտապ օգնության կայանից ոստիկանության Վանաձորի բաժին հաղորդել են, որ մարմնի տարբեր հատվածներում, ստորին ծնոտի բազմաթիվ ծակած-կտրած վերքերով Վանաձորի թիվ 1 հիվանդանոց է տեղափոխվել 62-ամյա Վոլոդյա Ադամյանը: Նա աշխատում է «Դիկտիս» ՍՊԸ-ին պատկանող «Էլիտար» տաքսի ծառայությունում որպես վարորդ:

Հիվանդանոց մեկնած Վանաձորի  ոստիկանության բաժնի օպերատիվ քննչական խմբին Վոլոդյա Ադամյանը հայտնել է, որ վնասվածքները ստացել է Լանջային փողոցի թիվ 32 հասցեի մոտ՝ անհայտ անձի կողմից իր վրա հարձակվելու հետեւանքով:

Պարզվել է, որ դեկտեմբերի 11-ին, ժամը 23.30-ի սահմաններում Տիգրան Մեծ պողոտայի թիվ 79 հասցեի մոտից նա անհայտ անձին տեղափոխել է Լանջային փողոցի թիվ 32 տան մոտ, որտեղ ուղեւորը դանակով մի քանի անգամ հարվածներ է հասցրել Ադամյանին եւ առեւանգել նրան ամրակցված «Նիսսան Սաննի» մակնիշի ԼԼ1600 համարանիշի ավտոմեքենան:

Նույն օրը ժամը 00.12-ին ոստիկանության Լոռու մարզային վարչության պետ Անուբախ Համբարյանի կողմից գործողության մեջ է դրվել «Ավտոհետախուզում» հատուկ միջոցառման պլանը: 

Ձեռնարկված օպերատիվ, հետախուզական եւ քննչական միջոցառումների արդյունքում  դեկտեմբերի 12-ին ժամը 01.50-ի սահմաններում ՀՀ ոստիկանության Լոռու մարզային վարչության Վանաձորի եւ Սպիտակի բաժինների ու ճանապարհային ոստիկանության 2-րդ սպայական գումարտակի 5-րդ սպայական վաշտի աշխատակիցների կողմից հետապնդվել է առեւանգված ավտոմեքենան: 

Վերջինիս վարորդը չի ենթարկվել ոստիկանության ծառայողների օրինական պահանջներին ու դիմել է փախուստի: Այնուհետեւ Սպիտակի բաժնի անչափահասների գործերով բաժնի օպերլիազոր Սամվել Սողոմոնյանի եւ ճանապարհային ոստիկանության 2-րդ սպայական գումարտակի 5-րդ սպայական վաշտի 1-ին դասակի տեսուչ Ռադիկ Ներսիսյանի կողմից օգտագործվել է զենք: 

Ռադիկ Ներսիսյանն իրեն ամրակցված հաշվեցուցակային «Մակարով» տեսակի ատրճանակով կրակոցներ է արձակել փախուստի դիմած ավտոմեքենայի անվադողերի վրա, որի հետեւանքով Վանաձոր-Ապարան ավտոճանապարհի 40-րդ կիլոմետրի՝ Արագածոտնի մարզի Ալագյազ գյուղի մոտ հարկադրաբար կանգնեցվել է մեքենան:

Ոստիկաններն այնուհետեւ կարողացել են վնասազերծել ավտոմեքենան առեւանգողին, որի մոտ նաեւ հայտնաբերվել է արյունոտ դանակը: Առեւանգողը՝ 1981 թվականին ծնված Արամ Սարգսյանը տեղափոխվել է ոստիկանության Վանաձորի բաժին: Նա քննիչի կողմից ձերբակալվել է: 

Իսկ բազմաթիվ վնասվածքներ ստացած Վոլոդյա Ադամյանին տրվել է դատաբժշկի ուղեգիր:

Փաստի առթիվ ոստիկանության Լոռու մարզի քննչական բաժնում նախապատրաստվում են նյութեր:

Լուսանկարները և տեսանյութը՝ Գագիկ Շամշյանի:

{gallery}shamshyan/taxi{/gallery}