Մարինա Մալախյանը ձերբակալվել է

Երևանի համար 122 դպրոցի արդեն նախկին տնօրեն Մարինա Մալախյանը ձերբակալված է։ Այս մասին ԼՈՒՐԵՐ․com-ին հայտնեցին Քննչական կոմիտեից:

Դատարան միջնորդություն է ներկայացվել Մարինա Մալախյանին կալանավորելու վերաբերյալ:

Ավելի վաղ տեղեկացրել ենք, որ դպրոցի ուսուցչուհիներից մեկը ձայնագրություն էր հրապարակել իր և տնօրենի մասնակցությամբ, որի ժամանակ խոսվում էր աշխատանքի ընդունման համար կաշառք տալու ու ստանալու մասին:

Դադարեցվել էր տնօրենի ղեկավարման իրավունքի հավաստագրի գործողությունը և կաշառք պահանջել ու ստանալու դեպքով հարուցվել էր քրգործ։ 

Հիշեցնենք՝ ոստիկանության ՔՈԳՎ կոռուպցիոն և տնտեսական հանցագործությունների դեմ պայքարի վարչությունում ստացված օպերատիվ տեղեկությունների հիման վրա վարչություն հրավիրված մի կնոջ սեպտեմբերի 1-ին ներկայացված բանավոր հաղորդման հիման վրա նախապատրաստված նյութերով փաստական տվյալներ են ձեռք բերվել, որ Երևանի Ալեքսանդր Բլոկի անվան թիվ 122 հիմնական դպրոցի տնօրենը, նույն դպրոցում որպես դասվար աշխատանքի ընդունելու և այդ կապակցությամբ հայտարարված մրցույթում հաղթող ճանաչելու գործընթացը կազմակերպելու համար, 2019 թվականի օգոստոսին իր աշխատասենյակում ոստիկանություն հրավիրված կնոջից որպես կաշառք պահանջել է 1500 դոլարին համարժեք 716 հազար դրամ, որից 1000 դոլարին համարժեք 478 հազար դրամը կինը տնօրենին է փոխանցել իրենց պայմանավորվածության մասին տեղեկացված, նույն դպրոցի ուսումնական աշխատանքների գծով փոխտնօրենի միջոցով, իսկ 500 դոլարին համարժեք 238 հազար դրամն անձամբ տվել է տնօրենին: