Ֆլորա Մարտիրոսյանի ընտանիքը, ընկերները, նպատակները և ծրագրերը (տեսանյութ, լուսանկարներ)

Մեծանուն երգչուհին՝ Ֆլորա Մարտիրոսյանը, դեռ շատ ծրագրեր ուներ, որոնք պետք է ծառայեին Հայոց ցեղասպանության ճանաչման նպատակին։ Նրա զենքը երգն էր, որը նա օգտագործեց ոչ թե ի շահ իրեն, այլ ծառայեցրեց հանուն իր ժողովրդի, իր երկրի և հայրենիքի։

ՀՀ ժողովրդական արտիստուհին հիմնադրեց միջազգային բարեգործական Artists For Peace կազմակերպությունը, որին իրենց մասնակցությունն ունեցան համաշխարհային աստղեր, ինչպիսիք են՝ Շերոն Սթոունի եղբայրը՝ դերասան Մայքլ Սթոունը, ում մինչև հոգու խորքը ցնցել էր հայկական ժողովրդական «Դլե յաման» երգը Ֆլորա Մարտիրոսյանի կատարմամբ, Սթիվի Ուանդերը, Մալինա Մոյեն, Չակա Խանը, Ալեքսիա Վասիլեուն, Էրիկ Բենետը, Արտո Թունջբոյաջյանը: Իսկ «Կռունկ» երգը Մարտիրոսյանը կատարեց ամերիկացի ռեփեր Պրասի հետ: Համերգը մեծ հաջողություն և արձագանք ունեցավ համաշխարհային մամուլում: Այս մասին գրեց և խոսեց ոչ միայն հայությունը, այլև ողջ աշխարհը։

Երգչուհին, չսահմանափակվելով այսքանով, արդեն իսկ նախագծեր ուներ, որոնք կյանքի կոչվելու ճանապարհին, սակայն, կտրվեց նրա կյանքի թելը։ 

Հեղինակների մտահղացմամբ՝ հայ ժողովուրդը 2015թ. պետք է ականատես դառնար փառահեղ համերգի. Հայաստանի ժողովրդական արտիստուհի Ֆլորա Մարտիրոսյանի հետ պետք է բեմ դուրս գային համաշխարհային մեծության աստղեր: Համերգը նվիրված էր լինելու 20-րդ դարի առաջին կեսին իրագործված ցեղասպանության 100-ամյակին, որը նաև կեզրափակեր ակցիան։