Համաժողովի նպատակը եվրոպական երկրների փորձի քննարկումն էր

Նոյեմբերի 21-ին Երևանում մեկնարկեց «Ցմահ դատապարտյալների հիմնախնդիրները» թեմայով միջազգային համաժողովը, որը կազմակերպել էր Հայաստանի Հելսինկյան կոմիտեն Բաց հասարակության հիմնադրամներ – Հայաստանի (ԲՀՀ) գրասենյակի աջակցությամբ՝ «Արևելք-արևելք. գործընկերություն սահմաններից այն կողմ ծրագրի» շրջանակներում և ԵԱՀԿ երևանյան գրասենյակի օժանդակությամբ: Նման համաժողով Հայաստանում կազմակերպվում է առաջին անգամ, հաղորդում է armhels.com կայքը:

Համաժողովի նպատակն է քննարկել եվրոպական երկրների փորձը ցմահ ազատազրկման նշանակման և կիրառման օրենսդրական մեխանիզմների վերաբերյալ, ինչպես նաև մշակել օրենսդրական փոփոխությունների առաջարկներ, որոնք ընդունելի և օգտակար կլինեն ցմահ դատապարտման նշանակման և կիրառման տեսանկյունից:

Համաժողովին մասնակցել են եվրոպական և նախկին ԽՍՀՄ 13 երկրների 20 ներկայացուցիչներ, ՀՀ օրենսդիր և գործադիր իշխանությունների, տեղական և միջազգային կառույցների ներկայացուցիչներ, փորձագետներ, տեսաբաններ, իրավագետներ և շահագրգիռ այլ անձինք:

Համաժողովի բացմանը մասնակիցներին ողջույնի խոսքով դիմեցին Հայաստանի Հելսինկյան կոմիտեի նախագահ Ավետիք Իշխանյանը, ԲՀՀ-Հայաստանի տնօրեն Լարիսա Մինասյանը, ՀՀ մարդու իրավունքների պաշտպան (ՄԻՊ) Կարեն Անդրեասյանը, ԵԱՀԿ երևանյան գրասենյակի Մարդու իրավունքների պատասխանատու Վլադիմիր Չունտուլովը, ՀՀ ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը:

Ելույթներով հանդես եկան ՀՀ մարդու իրավունքների պաշտպան Կարեն Անդրեասյանը, Հայաստանի Հելսինկյան կոմիտեի նախագահ Ավետիք Իշխանյանը, լրագրող Զարուհի Մեջլումյանը: Նրանք իրենց ելույթներում անդրադարձ կատարեցին Հայաստանում ցմահ դատապարտյալների առկա հիմնախնդիրներին, դրանց լուծմանն ուղղված քայլերին: