ՀՀ փոխվարչապետը ծանոթացել է Կոտայքում իրականացվող աշխատանքներին

ՀՀ փոխվարչապետ, տարածքային կառավարման նախարար Արմեն Գևորգյանն այսօր ծանոթացել է Կոտայքի մարզում իրականացվող պետական ծրագրերի ընթացքին:

Մարզպետ Կ. Շահգալդյանի և «Ջրային տնտեսության զարգացման և բարեփոխումների ծրագրերի իրականացման գրասենյակ» ՊՀ տնօրեն Ա. Ղազարյանի ուղեկցությամբ փոխվարչապետը նախ եղել է Արզնի Շամիրամ 1-ին հերթի ջրանցքի և «Արզնու ճյուղ» ջրանցքի վերականգնվող հատվածներում, ծանոթացել աշխատանքներին, որոնք իրականացվում են «Ոռոգման համակարգերի վերականգնման հրատապ ծրագրի» լրացուցիչ ֆինանսավորման ծրագրով: Զեկուցվել է, որ աշխատանքների մոտ 60%-ը կատարված է, հիմնական աշխատանքները կավարտվեն մինչև տարեվերջ: Ծրագրով նախատեսվում է վերականգնել Արզնի Շամիրամ 1-ին հերթի ջրանցքի 7,9 կմ և «Արզնու ճյուղ» ջրանցքի 9,1 կմ հատվածները:

Կոտայքի մարզի առաջնահերթ խնդիրների լուծման երրորդ ծրագրով հատկացված 96 մլն դրամով Պռոշյան համայնքում կառուցվել է նոր` 3,4 կմ երկարությամբ ոռոգման ցանց, ինչը հնարավորություն կտա ոռոգելի դարձնել լրացուցիչ 180 հա տարածք: Կառուցվել է նաև համայնքի նոր թաղամասի 1,2 կմ երկարությամբ խմելու ջրագիծը, որի համար նույն ծրագրով 24 մլն դրամ է հատկացվել: Փոխվարչապետը ծանոթացել է կատարված աշխատանքներին, տեղում նաև համայնքապետի հետ քննարկվել են սեփական եկամուտների հավաքագրման, ընթացիկ ծրագրերի հետ կապված հարցեր:

Ալափարս համայնքում երրորդ ծրագրով հատկացված 52,8 մլն դրամով կառուցվել է 2,4 կմ երկարությամբ ոռոգման նոր ցանց: Փոխվարչապետին զեկուցվել է, որ նույն ծավալի աշխատանքներ են նախատեսվում նաև չորրորդ ծրագրով, որի ավարտից հետո շուրջ 300 հա-ով կավելանան ոռոգելի հողատարածքները և անխափան ջրամատակարարում կապահովվի:

Հրազդան քաղաքում Ա. Գևորգյանն այցելել է «Լինսի» հիմնադրամի միջոցներով կառուցված թիվ 12 դպրոց, որը շահագործման է հանձնվել 2008թ. սեպտեմբերին: Ա. Գևորգյանը ծանոթացել է պայմաններին, շենքի պահպանման հետ կապված հարցեր է քննարկել պատասխանատուների հետ: Փոխվարչապետին զեկուցվել է նաև քաղաքի թիվ 8, 9, 11 դպրոցներում վերանորոգման աշխատանքների ընթացքի մասին. երրորդ և չորրորդ ծրագրերով այս դպրոցների նորոգման համար հատկացվել էր համապատասխանաբար 96 մլն, 76 մլն և 92 մլն դրամ, երրորդ ծրագրով նախատեսված աշխատանքներն ամբողջությամբ ավարտված են, նախապատրաստական աշխատանքներ են իրականացվում չորրորդ ծրագիրն սկսելու համար:

Փոխվարչապետն այցի ավարտին խորհրդակցություն է անցկացրել մարզպետարանում` պատասխանատուների, Ծաղկաձորի և Հրազդանի քաղաքապետերի մասնակցությամբ: Քննարկվել են մարզի առաջնահերթ խնդիրների լուծման երրորդ և չորրորդ ծրագրերին, սեփական եկամուտների հավաքագրմանը, ինչպես նաև ընթացիկ այլ խնդիրներին վերաբերող հարցեր: Զեկուցվել է, որ մարզում երրորդ ծրագիրը մոտենում է ավարտին, առաջիկայում կմեկնարկեն չորրորդ ծրագրի աշխատանքները: Փոխվարչապետին մասնավորապես տեղեկացվել է, որ երրորդ ծրագրով ավարտվել են միջհամայնքային ճանապարհների վերանորոգման աշխատանքները. բարեկարգվել է Նոր Գեղի- Քարաշամբ 6 կմ հատվածը, ինչպես նաև նախկինում գրեթե անանցանելի Արագյուղ-Քարաշամբ` 3,7 կմ ճանապարհը, որոնց համար երրորդ ծրագրով հատկացվել էր համապատասխանաբար 38 և 55 մլն դրամ:

Խորհրդակցությանը Ա. Գևորգյանն անդրադարձել է Կոտայքի մարզում «Գույքահարկի և հողի հարկի գծով առաջացած ապառքների մասին» օրենքի կիրարկման արդյունքում արձանագրված ցուցանիշներին` նշելով, որ մինչև ընթացիկ տարվա դեկտեմբերի 31-ը բնակիչները կարող են օգտվել սահմանված արտոնություններից` վճարելով հողի հարկի և գույքահարկի մասով ունեցած պարտքի մայր գումարը` ազատվել տույժերից: Նա հորդորել է համապատասխան իրազեկման աշխատանքներ իրականացնել բնակիչների շրջանում: