ՏԻ համակարգի զարգացման հարցեր

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց ԱՄՆ Միջազգային զարգացման գործակալության (ՄԶԳ) հայաստանյան գրասենյակի ղեկավար Քարեն Հիլիարդին:

Կողմերը քննարկեցին «Հայաստանի Հանրապետությունում տեղական ինքնակառավարման համակարգի հետագա զարգացման եւ ապակենտրոնացման ռազմավարական մոտեցումներ» փաստաթղթի հետ կապված հարցեր, որը մշակվել է ԱՄՆ ՄԶԳ-ի աջակցությամբ «Քաունթերփարթ ինթերնեշնլ» կազմակերպության կողմից իրականացվող «Քաղաքացիական հասարակության եւ տեղական ինքնակառավարման աջակցություն» ծրագրի շրջանակում:

«Մշակվել է բավականին հետաքրքիր փաստաթուղթ, որն արտացոլում է այսօրվա իրականության խնդիրները եւ առաջարկում է դրանց լուծումները»,-ընդգծեց փոխվարչապետը: Նշվեց, որ փաստաթուղթը լայն քննարկման է ներկայացվելու, առաջիկայում լսումներ կկազմակերպվեն ԱԺ համապատասխան հանձնաժողովում, Հանրային խորհրդում: Ստացված առաջարկությունների հիման վրա մինչեւ տարեվերջ այն կամբողջացվի եւ կմշակվի դրանից բխող միջոցառումների ժամանակացույց:

Փոխվարչապետը տեղեկացրեց, որ նախատեսվում է ստեղծել տեղական եւ միջազգային փորձագետներից կազմված խումբ, որը կզբաղվի նոր խմբագրմամբ «Տեղական ինքնակառավարման մասին» օրենքի մշակմամբ՝ փորձելով արտացոլել նշված փաստաթղթի մոտեցումները: ԱՄՆ ՄԶԳ հայաստանյան գրասենյակի ղեկավարն իր կառույցի անունից աշխատանքներին մասնակցելու պատրաստակամություն հայտնեց: Զրուցակիցները կարեւորեցին նաեւ տեղերում քննարկումների, թեմայի շուրջ բանավեճերի կազմակերպումը:

Ա. Գեւորգյանն անդրադարձավ նաեւ ԱՄՆ ՄԶԳ հայաստանյան գրասենյակի կողմից Արարատյան դաշտավայրի ստորերկրյա ջրային պաշարների ուսումնասիրության ծրագրի իրականացման նախաձեռնությանը: Նա ողջունեց գաղափարը՝ նշելով որ ջրային պաշարների արդյունավետ օգտագործման խնդիրը կառավարության ուշադրության կենտրոնում է, ինչպես նաեւ աջակցության պատրաստակամություն հայտնեց ծրագրի իրականացման գործում: