Բռնցքամարտի երիտասարդների աշխարհի առաջնության բացման մասին

ՀՀ սպորտի և երիտասարդության հարցերի նախարարի տեղակալ Խաչիկ Ասրյանի նախագահությամբ, նոյեմբերի 21-ին, նախարարության հանդիպումների դահլիճում տեղի է ունեցել աշխատանքային խորհրդակցություն՝ նվիրված բռնցքամարտի երիտասարդների աշխարհի առաջնության բացման հադիսավոր արարողության կազմակերպչական աշխատանքներին:

Հանդիպմանը ներկա են գտնվել ԲՈՒՀ-երի և մարզադպրոցների ներկայացուցիչներ, որոնց փոխնախարարը տեղեկացրել է, որ նոյեմբերի 28-ին կայանալու է մրցաշարի բացման հանդիսավոր արարողությունը և նշել այդ միջոցառման բացառիկ կարևորությունը: Նրա խոսքերով. «Շուրջ 10 օր ողջ աշխարհի ուշադրությունն ուղղված է լինելու Հայաստանին: Այնպես որ, աննախադեպ այս միջոցառումն անհրաժեշտ է կազմակերպել և անցկացնել բարձր մակարդակով, ինչի համար պատասխանատու ենք բոլորս՝ ողջ հայ ժողովուրդը»:

Նշենք, որ բռնցքամարտի երիտասարդների աշխարհի առաջնության բացման հանդիսավոր արարողությունը տեղի է ունենալու Կ. Դեմիրճյանի անվան մարզահամերգային համալիրում, նոյեմբերի 28-ին, ժամը՝ 18:00-ին, որին ներկա են լինելու ՀՀ և ՀԱՕԿ բարձրաստիճան ղեկավարներ, բռնցքամարտի միջազգային ֆեդերացիայի ներկայացուցիչներ, ինչպես նաև մասնակից 71 երկրների պատվիրակության անդամներ և շուրջ 15 երկրների լրատվամիջոցների ներկայացուցիչներ:

Բռնցքամարտի երիտասարդների աշխարհի առաջնությունը կտևի մինչև դեկտեմբերի 7-ը: Այս առաջնությունն անցկացվում է երկու տարին մեկ անգամ, որի մասնակիցները 17-18 տարեկան երիտասարդ բռնցքամարտիկներն են՝ 10 քաշային կարգերում: