Օլիմպիական մեդալներով Հայաստանը 4-րդն է ԱՊՀ–ում

«Աստղագիտություն» և «Ինֆորմատիկա» առարկաների միջազգային օլիմպիադաներում մրցանակների արժանացած աշակերտներին այսօր ընդունել է ՀՀ կրթության և գիտության նախարար Արմեն Աշոտյանը: Շնորհակալական խոսք հղելով աշակերտներին, ուսուցիչներին, թիմի ղեկավարներին ցուցաբերած արդյունքի համար՝ նախարարը նշել է. «Մոտ երեք ամիս առաջ ՀՀ Նախագահն ընդունեց միջազգային օլիմպիադաներում մրցանակային տեղերի արժանացած աշակերտներին, շնորհավորեց և հույս հայտնեց, որ գալիք երկու աշակերտական օլիմպիադաներում ևս հայ աշակերտները կշարունակեն նվաճել մեդալներ և հաջողությամբ հանդես գալով՝ բարձր կպահեն Հայաստանի պատիվը:

Անցավ երեք ամիս, և վերջին երկու՝ «Աստղագիտություն» և «Ինֆորմատիկա» առարկաների օլիմպիադաներում ևս մեր դպրոցականներն արձանագրեցին հերթական փայլուն արդյունքը՝ թվով 6 մեդալ, այդ թվում՝ 1 ոսկի, 1 արծաթ և 4 բրոնզ: «Հաջողության պատմություններ» արձանագրած աշակերտները մեր հպարտությունն ու ուրախությունն են և կրթական համակարգում տեղի ունեցող լայնածավալ փոփոխությունների արդյունավետության լավագույն ապացույցն ու աշխատանքի լավագույն հիմնավորումը, լավագույն սպեղանին՝ կրթական բարեփոխումներում իրականացվող խնդիրների հաղթահարման գործում»,-նշել է Արմեն Աշոտյանը՝ ընդգծելով, որ համաձայն վիճակագրության՝ այս տարվա ցուցանիշներով՝ 16 օլիմպիական մեդալ, Հայաստանի թիմը, Խորհրդային Միության նախկին երկրների, ինչպես նաև Թուրքիայի և Իրանի հետ համատեղ, կիսում է 5-7-րդ տեղերը: ԱՊՀ երկրների շարքում, ըստ նախարարի, Հայաստանի հավաքականը զբաղեցնում է 4-րդ տեղը, իսկ մեկ շնչին ընկնող մեդալների քանակով՝ 2-3-րդ տեղերը: Անդրկովկասի մյուս երկու երկրների՝ Վրաստանի և Ադրբեջանի հավաքականները զբաղեցրել են համապատասխանաբար 14-րդ և 15-րդ տեղերը: «2012 թվականի դպրոցականների առարկայական միջազգային օլիմպիադաների արդյունքով՝ Հայաստանի աշակերտները սահմանել են յուրահատուկ ռեկորդ անկախ Հայաստանի պատմության մեջ՝ ցուցաբերելով ամենաբարձր արդյունքները: Եվս մեկ ուրախալի փաստ՝ այս տարի ընդլայնվել է նաև դպրոցների աշխարհագրությունը՝ այդ թվում նաև մարզային. փայլուն են հանդես եկել Գորիս և Վանաձոր քաղաքի դպրոցները՝ ցույց տալով, որ Հայաստանում կրթության որակի վրա կատարվող աշխատանքների բարելավման ուղղությամբ իրականացվող քայլերն իրենց պտուղները տալիս են ոչ միայն օլիմպիական շարժման ավանդական դպրոցներում, այլ նաև մարզային կրթօջախներում: Հուսով եմ, որ հաջորդ տարի ավելի մեծ ներկայացվածություն կունենանք մարզերի աշակերտության կողմից»,-ընդգծել է Արմեն Աշոտյանը՝ հավաստիացնելով, որ այսուհետ ևս նախարարության ուշադրության կենտրոնում են լինելու օլիմպիականների նախապատրաստման և հավաքագրման աշխատանքները, որպեսզի, ըստ նախարարի, ապագայում ևս .հայ օլիմպիականները լավագույնս ներկայացված լինեն միջազգային օլիմպիադաներում և իրենց ցուցանիշներով ուրախացնեն հայ հասարակությանը: Արմեն Աշոտյանը, մեկ անգամ ևս շնորհակալություն հայտնելով օլիմպիականների ուսուցիչներին, մարզիչներին, դպրոցի տնօրեններին, ինչպես նաև ծնողներին՝ աշակերտների կրթության գործում իրենց ավանդն ունենալու, ինչպես նաև նրանց կայացման և առաջխաղացման համար, աշակերտներին հանձնել է պարգևներ՝ ՀՀ կառավարության անունից: Օլիմպիականներն ու ուսուցիչներն էլ իրենց հերթին շնորհակալություն են հայտնել նախարարին՝ անմիջական աջակցության, ինչպես նաև թիմերին Ծաղկաձորում «մարզվելու» և ուսումնական հավաքների հնարավորություն ընձեռելու համար:

2012 թվականին «Մաթեմատիկա», «Ֆիզիկա», «Կենսաբանություն», «Քիմիա», «Ինֆորմատիկա» և «Աստղագիտություն» առարկաների գծով առարկայական միջազգային օլիմպիադաներին մասնակցել է 29 հայ դպրոցական՝ նվաճելով 16 մեդալ՝ 1 ոսկի, 2 արծաթ, 13 բրոնզ և 5 գովասանագիր: Առհասարակ, բոլոր առարկաների գծով այս տարի հայ օլիմպիականները գրավել են մրցանակային տեղեր:
Ի դեպ, 2003 թվականին հայ աշակերտները նվաճել են 11, 2004 թվականին համապատասխանաբար՝ 14, 2005–ին՝ 10, 2006-ին՝ 5, 2007-ին՝ 8, 2008-ին՝ 5, 2009-ին՝ 7, 2010-ին՝ 7 և 2011-ին՝ 6 մեդալ: