Lurer.com-ի հրապարակման հիման վրա` ՃՈ հայհոյող, օրինախախտ պետավտոտեսուչներն ազատվել են աշխատանքից

Ճանապարհային ոստիկանի պարտականությունները ոչ պատշաճ կատարելու և քաղաքացիների հետ շփվելիս էթիկայի կանոնները չպահպանելու պատճառով ՀՀ ոստիկանության պետ Վլադիմիր Գասպարյանի հրամանով ՃՈ աշխատակիցներ Լևոն Մատինյանն ու Կարեն Մելքոնյանն ազատվել են զբաղեցրած պաշտոններից և գրանցվել կադրերի ռեզերվում: Այս մասին Լուրեր.com-ի հետ զրույցում ասաց ոստիկանության լրատվության բաժնի պետ Աշոտ Ահարոնյանը:

Հիշեցնենք, որ ավելի վաղ Լուրեր.com-ը ներկայացրել էր տեսանյութ, որտեղ պարզ երևում էր, թե ինչպես է ճանապարհային ոստիկանը խախտում սահմանված կարգը։ Ճանապարհային ոստիկանի ծառայողական մեքենան հետևում է վարորդին, վազանց անում նրա մեքենան՝ հատելով հոծ գիծը և դուրս գալով հանդիպակաց երթևեկելի գոտի։ Տեսանյութում երևում է, թե ինչպես է ղեկին նստած ոստիկանը սկսում գոռգոռալ՝ «Լավ եմ անում, արա այ տղա»... Վարորդը պահանջել է աջ մայթի մոտ կանգ առնել։ Երբ ՃՈ աշխատակիցները մոտեցել են և տեսել, որ ավտոմեքենայի մեջ տեղադրված տեսախցիկը նկարահանել է փաստը, իսկ վարորդը պատրաստվում է զանգահարել «1-02», շփոթված հետ են գնացել ու նստելով ծառայողական մեքենան՝ հեռացել։