Ադրբեջանը բողոքել է` ԼՂՀ-ն որպես ինքնիշխան պետություն ներկայացնելու համար

Բենիլյուքսի ադրբեջանցիների կոնգրեսը (КАБ), որի գլխավոր գրասենյակը Ամստերդամում է, վերջերս պաշտոնապես դիմել է BNN հեռուստաալիքի ղեկավարությանը` հոլանդացի լրագրողի կողմից պատրաստված հաղորդման առնչությամբ, որի ընթացքում ներկայացվել է Լեռնային Ղարաբաղի Հանրապետությունը: Այս մասին գրում է ադրբեջանական իշխանական «Эхо» թերթը:

Բենիլյուքսի ադրբեջանցիների կոնգրեսը պահանջել է, որ այդ հաղորդումը պատրաստած լրագրողը ներողություն խնդրի ադրբեջանցի ժողովրդից, ինչպես նաև հեռացնի այդ հաղորդումը համացանցից: Կոնգրեսը նաև հույս է հայտնել, որ ապագայում նման բնույթի հաղորդումներ չեն հեռարձակվի այդ հեռուստաալիքով:

Հիշեցնենք, որ նոյեմբերի 11-ին Հոլանդիայի պետական BNN հեռուստաալիքի՝ ճանապարհորդություններին նվիրված «3 op Reis» հաղորդման ժամանակ հոլանդացի լրագրող Պատրիկ Լիդիերսը պատմել է հանդիսատեսին նոր երթուղու մասին դեպի Լեռնային Ղարաբաղի Հանրապետություն: Վերջինս նաև տեղեկատվություն է տրամադրել ինքնիշխան պետության՝ ԼՂՀ-ի մասին, պատմել է դրոշի, զինանշանի և տարածքի մասին, խորհուրդ է տվել ցանկացողներին ճանապարհորդել դեպի Լեռնային Ղարաբաղ:

Լիդիերսը խորհուրդ է տվել նաև բոլոր պոտենցիալ ճամփորդներին՝ մուտքի արտոնագիր ստանալու համար դիմել Նիդերլանդների Թագավորությունում Հայաստանի հյուպատոսություն: