«Հրապարակ». Գագիկ Ծառուկյանը բոյկոտե՞ց ԱԺ արտահերթ նիստը

Գագիկ Ծառուկյանը ոչ միայն չի մասնակցում Աժ աշխատանքներին, ԲՀԿ-ի նախաձեռնած կոնսուլտացիաներին, ՀԱԿ-ի երեկ հրավիրած Աժ նիստին, այլև չի ստորագրել արտահերթ նիստ հրավիրելու նախաձեռնության տակ: «Ինչպե՞ս են ՀԱԿ-ում վերաբերվում այդ հանգամանքին» «Հրապարակ»-ի հարցին Լևոն Զուրաբյանը երեկ ոչ մի կերպ չցանկացավ պատասխանել` ասաց, թե շատ զբաղված է, տեղ է գնում: Այնուհանդերձ, երբ լրագրողները շրջապատեցին նրան, «Հրապարակ»-ը կրկին հարցրեց, ի՞նչ է կարծում` ԲՀԿ ֆրակցիայի ղեկավար Գագիկ Ծառուկյանը ՀՀԿ-ի հետ համահունչ նո՞ւյնպես բոյկոտում է արտահերթը` չմասնակցելով նիստին:

«Ինքը նման հայտարարություն արե՞լ է. հարցն ուղղեք իրեն»,- պատասխանեց Լևոն Զուրաբյանը: Լևոն Տեր-Պետրոսյանը երեկ իր հոդվածում ասել էր, որ ՀՀԿ-ի' արտահերթին չմասնակցելը «գավառամտություն, ամբարտավանություն, զոռբայություն և տգիտություն» է, դա բոլորի՞ն է վերաբերում, թե՞ միայն ՀՀԿ-ին,- շարունակեց թերթը: «Խոսքը քաղաքական որոշման մասին է. առանձին մարդիկ կարող են ցանկացած ֆրակցիայից և հարգելի պատճառով բացակայել. մեր մոտ էլ Ստեփան Դեմիրճյանն էր բացակայում, ես որևէ մեկի բացակայության պատճառներն ստուգե՞լ եմ, որ իմանամ` ինչու չի եկել, խոսքը գնում է Հանրապետական կուսակցության որոշման մասին, որի մասին իրենք հրապարակավ հայտնել են»,- ասաց ՀԱԿ համակարգողը: