Տոլոկոննիկովայի հեղինակությամբ գիրք է լույս տեսել Pussy Riot-ի մասին

Ռուսաստանում սկանդալային Pussy Riot պանկ խմբի անդամ Նադեժդա Տոլոկոննիկովայի հեղինակությամբ լույս է տեսել գիրք, որը պատմում է խմբի մասին: Գրքի մեկ օրինակն արժի 161 ռուբլի:

Մոսկվայում Քրիստոս Ամենափրկչի տաճարում կատարած պանկ աղոթքի համար 2 տարի ազատազրկման դատապարտված խմբի անդամը հրատարակել է իր գիրքը «Pussy Riot. Ի՞նչ էր դա» անվանումով:

«Տաճարում կազմակերպած համերգը, որը կատարվել էր Pussy Riot-ի ֆեմինիստուհիների կողմից, տխուր ավարտվեց խմբի 3 անդամների համար, որոնց դատապարտեցին ազատազրկման, սակայն նրանց պատմությունը դրանով չի ավարտվել, այլ միայն սկիզբ է առել»,-ասված է գրքի նախաբանում:

Հետաքրքիր է, որ գրքի հրատարակման ամսաթիվը նշված է 2012թ., այնինչ ողջ այդ ընթացքը խմբի անդամները կալանավայրում են եղել: Աղջիկների փաստաբանները նշում են, որ երբեք տեղյակ չեն եղել այն մասին, թե նրանք պատրաստվում են գիրք հրատարակել:

Lifenews-ը հայտնում է, որ գիրքը պարունակում է հանրությանն ազատորեն հասանելի նյութեր՝ նամակներ, հարցազրույցներ, սոցիալական կայքերում արված գրառումներ, նամակագրություններ: