Հայաստան այցելած ադրբեջանցուն արգելել են մուտք գործել Բաքու

Բաքվի օդանավակայանում 2 օր անցկացրած ադրբեջանցի Բայրամ Ազիզովը, ով հանդիսանում է «Բիլայն Ղազախստան» ընկերության հասարակայնության հետ կապերի բաժնի պետը, մեկնաբանելով Ադրբեջան մուտք գործելու համար Բաքվի օդանավակայանում իր ստացած մերժումը, նշել է. «Ես երեկ չէ առաջին օրը ժամանեցի Բաքու: Անձնագրային հսկիչ կետում սահմանապահը, տեսնելով իմ անձնագրում Հայաստան այցելելու մասին կնիքը, վերցրեց իմ անձնագիրը և ինձ ուղեկցեց օդանավակայանի անցումային գոտի, ուր ես անցկացնում եմ արդեն 2-րդ օրը»,-հայտնում է Vesti.az-ը:

Ազիզովը նշել է, որ իր մերժման պաշտոնական վարկածը չեն պարզաբանում, սակայն ոչ պաշտոնական զրույցում իրեն բացատրել են, որ դրա պատճառն այն է, որ նա նախկինում գործուղման է մեկնել Հայաստան:

«Իմ ձեռքից վերցրել են անձնագիրս, միայն 2 օր անց սկսեցին սննդով ապահովել, բազմաթիվ հարցեր են տալիս, թե ով եմ ես և ինչ եմ ես այստեղ անում: Ինչու է ադրբեջանցին իրեն թույլ տվել այցելել Հայաստան: Առավոտյան առհասարակ հրաժարվեցին սնունդ տրամադրել: Նստած սպասում եմ. խոստացել են մոտենալ». մեջբերում ենք Ազիզովի՝ Twitter-ում կատարած գրառումները:

Vesti.az-ի լրագրողների կատարած այն նշումներին, թե նա պետք է իմանար, որ Հայաստանում եղած քաղաքացիներին արգելվում է մուտք գործել Ադրբեջան, Ազիզովը հայտարարել է, որ մեկ տարի առաջ նա այցելել էր Վրաստան, որտեղից նա հանգիստ կերպով հատել էր հայ-վրացական սահմանը, չնայած այն բանին, որ իր անձնագրում ազգության բաժնում գրված է «ադրբեջանցի»:

«Իմ ընկերները Վրաստանում ասացին, որ հայ-վրացական սահմանը գտնվում է մոտակայքում, որը և ինձ առաջարկեցին հատել, որպեսզի ես տեսնեմ Հայաստանը: Անկեղծ ասած, ես վախեցա, քանի որ անձնագրումս նշված է, որ ես ադրբեջանցի եմ, սակայն իմ ընկերներն ինձ հանգստացրին, և մենք անարգել անցանք հայ-վրացական սահմանը: Այդ պատճառով էլ ես մտածում էի, թե խնդիրներ չեմ ունենա ադրբեջանական սահմանը հատելիս: Սակայն այստեղ ես սխալվեցի: Ես Ղազախստանի քաղաքացի եմ, և երբեք չեմ եղել Ադրբեջանում: Ես շատ ադրբեջանցի ընկերներ ունեմ և ցանկանում էի այցելել նրանց»:

Ազիզովն այս պահի դրությամբ դեռևս «գերեվարված» է Բաքվի օդանակայանում: