Պատգամավորի թեկնածուն՝ թիվ 1 ընտրատարածքում խախտումների մասին

Թիվ 1 ընտրատարածքում Ազգային ժողովի մեծամասնական ընտրակարգով լրացուցիչ ընտրություններում «Ժառանգություն» կուսակցության թեկնածու Ստյոպա Սաֆարյանը նոյեմբերի 19-ին պաշտոնական նամակով դիմել էր ՀՀ Ոստիկանության անձնագրային և վիզաների վարչության պետ, ոստիկանության գնդապետ Հովհաննես Քոչարյանին: Առաջնորդվելով ՀՀ Ընտրական օրենսգրքով՝ ԱԺ պատգամավորի թեկնածուին վերապահված իրավունքներով, ինչպես նաև՝ «Տեղեկատվության ազատության մասին» ՀՀ օրենքի 6-րդ հոդվածի 1-ին մասի պահանջներով, խնդրել է իրեն տրամադրել. 

1. թիվ 1 ընտրատարածքի ընտրողների ցուցակը տպագիր և էլեկտրոնային տարբերակներով,
2. Հայաստանի Հանրապետության ընտրողների ամբողջական ցուցակը էլեկտրոնային տարբերակով: Սակայն վերջինս մերժում է ստացել

«Մենք հստակ տեղեկություններ ունենք, որ ցուցակներում այլ համայնքներից մարդիկ են բերվել և գրանցվել թիվ մեկ ընտրատարածքում։ Իմ պահանջած թղթերը փակ փաստաթղթեր չեն և ես այդ կերպ փորձում եմ օգնել Ոստիկանությանը մաքրել ընտրացուցակները։ Անհասկանալի և անօրինական են այն մերժումները, որոնք եկել էին ոստիկանությունից»,-ասում է թեկնածուն։

Ստյոպա Սաֆարյանի խոսքով՝ բազմաթիվ հասցեներում, որոնք իր ձեռքում կան, գրանցված են անծանոթ մարդիկ, որոնց, թեկնածուի կարծիքով, որոշակի նպատակներով են բերել և գրանցել։ Անգամ գրանցումներ կան գիշերօթիկ դպրոցներում, և նա տեղեկություններ ունի, որ դպրոցների տնօրենները ՀՀԿ-ի թեկնածուի բուկլետներ են բաժանում։

«Բողոքարկելու եմ Ոստիկանության այս պատասխանը, քանի որ այդ ընտրացուցակները փակ համարվում են միայն ընտրություններից հետո, իսկ առաջ հրապարակման ենթակա փաստաթղթեր են և պետական գաղտնիք չեն ներկայացնում իրենցից։ Բացի այդ՝ պատասխան նամակով Ոստիկանությունը խնդիրը գցել է ԿԸՀ-ի դաշտ, և կփորձեմ նրանց ևս դիմել»,- նշեց Ստյոպա Սաֆարյանը։

Վերջինիս խոսքով՝ ՀՀԿ-ական թեկնածուի նախընտրական շտաբները սահմանված կարգից շատ են, ինչպես նաև ծախսերի անհամաչափություն է նկատվում, այդ իսկ պատճառով Ստյոպա Սաֆարյանը կդիմի համապատասխան մարմիններին, որպեսզի ՀՀԿ-ական թեկանածուի թեկնածությունը չեղյալ ճանաչվի։