Րաֆֆի Հովհաննիսյանի կոշտ հայտարարությունները Բաքվում

Լեռնային Ղարաբաղի բնակիչներն ինքնորոշման իրավունք ունեն։ Բաքվում այսօր լրագրողների հետ հանդիպմանը հայտարարել է «Ժառանգություն» կուսակցության առաջնորդ, Հանրապետության առաջին ԱԳ նախարար Րաֆֆի Հովհաննիսյանը։ Նա մասնակցում է Ադրբեջանի մայրաքաղաքում ընթացող Ասիայի քաղաքական կուսակցությունների կոնֆերանսին։

«Ես հուսով եմ, որ մենք կարող ենք հասնել խաղաղության, վերականգնել հարաբերությունները, և դա տեղի կունենա այն ժամանակ, երբ կողմերից յուրաքանչյուրը կհասկանա, որ պատասխանատվություն է կրում ողջ տարածաշրջանի համար։ ԼՂ բնակիչները հավասար իրավունքներ ունեն իրենց ինքնության մասին հայտարարելու։ Անհրաժեշտ է հարգել միմյանց, հարգել միմյանց ինքնությունը և մշակույթը»,- ասել է Հովհաննիսյանը։

Նա նշել է, որ կտրուկ արտահայտությունները չեն նպաստում խաղաղ կարգավորման ընթացքին։

«Ես ընդունում եմ 700 հազար ադրբեջանցի փախստականների եւ տեղահանվածների իրավունքը և Բաքվից ու Սումգայիթից տեղահանված 400 հազար հայ փախստականների իրավունքը»,-ասել է նա, հավելելով, որ բոլոր փախստականները կարող են վերադառնալ իրենց տները, այդ թվում՝ ադրբեջանցիները՝ անկախ Արցախ, իսկ հայերը՝ Թուրքիա։

Հովհաննիսյանը նշել է, նաև, որ սա իր առաջին այցելությունն է Բաքու։ «Այս ընթացքում ես մտադիր եմ այցելել հայկական եկեղեցի և հանդիպել հայերի հետ»,-ասել է «Ժառանգության» առաջնորդը, նկատելով, որ Բաքուն բազմազգ քաղաք է, որում, սակայն, շատ քիչ հայեր կան։

Անդրադառնալով ԼՂ հիմնախնդրի կարգավորման ընթացքին՝ Հովհաննիսյանը նշել է, որ ճիշտ չէ օգտագործել այնպիսի քաղաքական բառեր, ինչպիսին է «օկուպացիան»։

«Նույն այդ տերմինաբանությամբ՝ հայկական հողերի մեծ մասը գտնվում է Թուրքիայի եւ Ադրբեջանի ուժերի օկուպացիայի ներքո։ Այդ պատճառով իմ տեսակետը հետևյալն է՝ պետք է հաղթահարել անցյալի ժառանգությունը։ Յուրաքանչյուր երկիր պետք է ինքնաքննադատաբար վերաբերվի իրեն»,-ասել է նա։

Ըստ ադրբեջանական լրատվամիջոցների՝ Րաֆֆի Հովհաննիսյանը հայտարարել է նաև, որ իր կարծիքով հակամարտության պատճառն Ադրբեջանի ագրեսիան է ԼՂ բնակչության նկատմամբ։

a1plus